یوم القدس پر ملک بھر میں القدس ریلیاں نکالی گئیں،شرکاء نے مظلوم فلسطینیوں سے اظہاریکجہتی کیا۔ وفاقی دارالحکومت اسلام آباد میں یوم القدس کے حوالے سے مرکزی القدس کمیٹی کی جانب سے ریلی جی سکس امام بارگاہ آبپارہ چوک تک نکالی گئی۔

مجلس وحدت المسلمین کی ریلی جی سکس سے ڈی چوک تک جبکہ تحریک نفاذ فقہ جعفریہ نے دربار سخی محمود شاہ سے آبپارہ تک ریلی نکالی ، ریلی کے شرکاء فلسطینی عوام کے حق و امریکا و اسرائیل مخالف نعرے بھی لگائے۔

قبلہ اول پر اسرائیل کے ناجائز قبضے کے خلاف لاہور میں یوم القدس کی ریلی امامیہ اسٹوڈنٹس آرگنائزیشن کے زیراہتمام اسلام پورہ سے پنجاب اسمبلی تک ریلی نکالی گئی، شرکاء کا کہنا تھا کہ فلسطین کی آزادی تک جدوجہد جاری رہے گی۔

ملتان میں مجلس وحدت المسلمین،سرگودھا میں امامیہ اسٹوڈنٹس آرگنائزیشن کے زیر اہتمام جبکہ سیالکوٹ، سمیت پنجاب کے دیگر شہروں میں بھی یوم القدس کے حوالے سے ریلیاں نکالی گئیں۔

کراچی میں یوم القدس کے سلسلے میں مرکزی ریلی امامیہ اسٹوڈنٹس کے تحت نمائش چورنگی سے تبت سینٹر تک جبکہ ریگل چوک سے پریس کلب تک شیعہ علماء کونسل کے تحت القدس ریلی علامہ ناظر عباس تقوی کی قیادت میں نکالی گئی۔

مقررین کا کہنا تھاکہ وہ فلسطین میں اسرائیلی جارحیت کی مذمت کرتے ہیں،انہوں نے اقوام متحدہ اور او آئی سی سے کہا کہ وہ فلسطین میں مسلمانوں کے قتل عام بند کرانے کے لیے اپنا کردار ادا کرے۔

حیدرآباد میں آئی ایس او، شیعہ علماء کونسل، مجلس وحدت المسلمین سمیت دیگر تنظیموں کی جانب سے قدم گاہ مولا علی سے پریس کلب تک یوم القدس کی ریلیاں نکالی گئیں۔

سکھر میں شیعہ علماءکو نسل، جعفریہ اسٹو ڈنٹ آر گنائیزیشن کے زیر اہتمام جبکہ نواب شاہ، بدین، ٹھٹھہ، ٹنڈومحمد خان سمیت سندھ کے دیگر شہروں میں بھی یوم القدس کے حوالے سے ریلیاں نکا لی گئیں ۔

فلسطینیوں سے اظہار یکجہتی کے لیے کوئٹہ میں القدس کمیٹی کے زیراہتمام امام بارگاہ نیچاری سے بہشت زینب ہزارہ قبرستان تک القدس ریلی نکالی گئی۔

مقررین کا کہنا تھا کہ القدس کا مسئلہ اہم اور تمام مسلمانوں کا مسئلہ ہے، اسے حل ہوجانا چائیے،تاکہ قبلہ اول اور فلسطینی مسلمانوں کی تحفظ یقینی ہو۔