پاکستان تحریک انصاف کے چیئرمین عمران خان نے کراچی میں لیجنڈ کرکٹر حنیف محمد کے اہل خانہ سے ملاقات کی اور تعزیت کا اظہار بھی کیا۔

اس موقع پر میڈیا سے گفتگو کرتے ہوئے ان کا کہنا تھا کہ کرکٹرحنیف محمد پاکستان کا اہم اثاثہ اور ہمیشہ میچ ونر تھے، ان کی خدمات ہمیشہ یاد رکھی جائیں گی، انہوں نے اپنے کھیل سے ملک کا نام روشن کیا،ان میں بہترین بیٹسمین کی تمام خصوصیات موجود تھیں۔

حنیف محمد کےگھر کےباہر عمران خان نے سیاسی باتوں سے گریز کرتے ہوئے کہا کہ سیاسی باتیں نشتر پارک کے جلسے میں کروں گا، حنیف محمد تمام کھلاڑیوں کےلیے رول ماڈل تھے، حکومت کو ان کی مدد کرنی چاہیے تھی۔

انہوں نے مزید کہا کہ حنیف محمد عظیم کرکٹر تھے، وہ مجھ سے پہلے ریٹائرڈ ہوچکے تھے، ٹیلنٹ،ٹمپرامنٹ، تکنیک میں اُن کا کوئی ثانی نہیں تھا۔

عمران خان نے یہ بھی کہا کہ وزیراعظم کوکوئی حق نہیں ہے کہ وہ اپنے سفارشی کو کرکٹ بورڈ میں لگائیں، جب تک کرکٹ کو ادارہ نہیں بنایا جائےگاکرکٹ میں بہتری نہیں ہوگی، حکومت کو حنیف محمد مرحوم کے نام سے کوئی اسٹیڈیم منسوب کرنا چاہیے۔