اسلام آباد … صدر مملکت آصف علی زرداری نے راجا پرویز اشرف کو پاکستان کا نیا وزیراعظم منتخب ہونئے پر مبارکباد پیش کرتے ہوئے اسے جمہوریت پر اعتماد قرار دیا ہے۔ صدر آصف زرداری کا کہنا ہے کہ راجا پرویز اشرف کی کامیابی عوام کا جمہوریت پر اعتماد ہے۔ انہوں نے وزیراعظم منتخب ہونے پر راجا پرویز اشرف کومبارکباد پیش کی۔ انتخاب میں کامیابی کے بعد راجہ پرویز اشرف نے وزیراعظم کی نشست سنبھال لی ہے جس کے بعد ایوان میں جئے بھٹو اور زندہ ہے بی بی زندہ ہے کے نعرے لگائے گئے۔واضح رہے کہ سابق وزیراعظم یوسف رضا گیلانی کو سپریم کورٹ کی جانب سے نااہل قرار دیئے جانے کے بعد آج قومی اسمبلی میں نئے وزیراعظم کے انتخاب کیلئے پولنگ ہوئی جس میں راجا پرویز اشرف نے 211 ووٹ حاصل کرکے کامیابی حاصل کی، مسلم لیگ ن کے سردار مہتاب عباسی کو 89 ووٹ ملے۔ وزارت عظمیٰ کے امیدوار جمعیت علمائے اسلام (ف) کے سربراہ مولانا فضل الرحمان نے اجلاس شروع ہونے کے بعد انتخاب سے دستبرداری اور ووٹ میں حصہ نہ لینے کا اعلان کیا تھا جس کے بعد راجا پرویز اشرف اور سردار مہتاب عباسی کے درمیان ون آن ون مقابلہ تھا۔