بھارتی فلموں کے سینئر اداکار اوم پوری کے انتقال پر ممبئی کی فلم نگری اداس ہوگئی، معروف بھارتی اور پاکستانی اداکاروں نے اوم پوری کے بچھڑنے پر افسوس کا اظہار کیا ہے۔

اکتالیس برس تک بالی ووڈ میں اپنے فن کا مظاہرہ کرنے والے اوم پوری کی موت پر سب ہی فنکار اداس ہیں، اور نکا کہنا تھا کہ بھارتی فلمی صنعت کا ایک بڑا نام رخصت ہوا۔فلم انڈسٹری اوم پوری کے رخصت ہونے پر سوگوار ہے۔

معروف بھارتی اداکاروں نے ٹوئیٹر پر اپنے جذبات کا اظہار کیا۔امیتابھ بچن کا کہنا ہے کہ مجھے یقین ہی نہیں آرہا، اتنا زندہ دل انسان کیسے یوں دنیا سے رخصت ہوسکتا ہے۔شاہ رخ خان کہتے ہیں کہ اوم پوری کے قہقہے ہمیشہ یاد رہیں گے، فلم انڈسٹری ان کو بہت مس کرے گی۔

ماہرہ خان نے لکھا ہے کہ دنیا ایک بڑے آرٹسٹ سے محروم ہوگئی، اوم پوری یقینا بھارتی فلم انڈسٹری کے بہترین اداکاروں میں سے تھے۔عامر خان نے بھی افسوس کا اظہار کرتے ہوئے کہا ہے کہ ہم نے بھارتی سنیما کے بہترین اداکاروں میں سے ایک کھودیا ہے۔

نواز الدین صدیقی کا کہنا ہے کہ اوم پوری ان کے لیے ہمیشہ انسپیریشن رہے ہیں، ان کے دنیا سے رخصت ہوجانے سے صدمہ ہوا۔انوشکا شرما کہتی ہیں کہ اوم پوری نے اپنی جاندار اداکاری سے کئی کرداروں کو زندگی بخشی۔عالیہ بھٹ نے نے کہا کہ اوم پوری کے انتقال سے سخت صدمہ ہوا، وہ بھارتی فلم انڈسٹری کا ایک بڑا نام تھے۔

مہیش بھٹ کا کہنا ہے کہ جب بھارت میں نفرت کی آندھی چل رہی تھی تو اوم پوری وہ واحد شخص تھے جو محبت کی بات کررہے تھے، اوم پوری پاکستان اور بھارت کے بہتر ثقافتی تعلقات کے سب سے بڑے حامی تھے ۔