دنیائے فٹبال کے معروف کھلاڑی رائن گگز  پاکستان کے سابق اسٹار کرکٹر وسیم اکرم کے مداح نکلے۔

برازیل کے رونالڈینو اور رائن گگز سمیت 7 انٹرنیشنل فٹبالرز پاکستان پہنچ چکے ہیں اور وہ دو نمائشی میچوں میں شائقین کو محظوظ کریں گے جن میں سے ایک میچ کراچی اور دوسر ا لاہور میں ہوگا۔

پاکستان پہنچنے پر اسٹال فٹبالرز بھی پرجوش ہیں اور انہوں نے اپنے پاکستانی مداحوں کے لیے پیغامات دیئے ہیں۔

انٹرنیشنل فٹبالر رائن گگز کا کہنا تھا کہ پاکستانی فٹبال شائقین نے کبھی بھی انٹرنیشنل کھلاڑیوں کو اپنے سامنے کھیلتے ہوئے نہیں دیکھا لیکن یہ اب اہم موقع ہے جب اپنے ملک میں ہی کھلاڑیوں کو کھیلتا دیکھیں گے۔

پاکستان میں فٹبال کے مستقبل کے حوالے سے انہوں نے کہا کہ یہاں بے شمار نوجوانوں میں فٹبال کا ٹیلنٹ موجود ہے اور میں یہاں یہی ٹیلنٹ دیکھنے کا خواہاں ہوں۔

ان کا کہنا تھا کہ دنیا بھر میں فٹبال کے کھیل کو پھیلانے کے لیے سفر کیا اور اب پاکستان میں بین الاقوامی فٹبالرز کا آنا ایک بہترین موقع ہے۔

رائن گگز نے اپنے کرکٹ سے لگاؤ کے بارے میں بھی بتایا۔

ان کا کہنا تھا کہ میں 80 کی دہائی میں بڑا ہوا اور اس وقت ویسٹ انڈیز بہترین ٹیم ہوا کرتی تھی اسی وجہ سے عظیم کرکٹر سر ویوین رچرڈ ،لین بوتھم اور پاکستانی سابق اسٹار کرکٹر وسیم اکرم کا مداح ہوں۔

گگز نے کہا کہ وسیم اکرم ہمیشہ سے ہی بہترین کرکٹر رہے ہیں جب کہ ہم دونوں میں ایک چیز مشترک بھی ہے کہ وسیم اکرم بائیں ہاتھ سے بولنگ کرتے تھے اور میں بھی الٹے پاؤں سے کھیلتا ہوں۔

ان کا کہنا تھا کہ وہ کرکٹ میں بیٹنگ نہیں صرف بولنگ کرسکتے ہیں۔

جب کہ اسٹار فٹ بالر رونالڈینو نے کہاکہ میں ہی نہیں بلکہ ہر کھلاڑی پاکستان میں کھیلنے پر بے حد خوش ہے اور امید کرتے ہیں کہ ہم اچھا کھیل پیش کریں گے۔

انہوں نے کراچی اور لیاری والوں کے لیے اپنے پیغام میں کہا کہ مداحوں کی جانب سے سراہنے اور پذیرائی پر ان کا شکریہ ادا کرتا ہوں۔

رونالڈینو نے میچ کے دوران گول کرنے پر روایتی سامبا ڈانس کرنے کا بھی اعلان کیا۔