کھیل
17 جولائی ، 2017

ومبلڈن: جملے کسنے پر کھلاڑی کا تماشائی کو چیلنج

کھیل کے میدان پر شائقین کی جانب سے کھلاڑیوں کا تلخ جملوں کا سامنا کرنا کوئی نئی بات نہیں تاہم جمعے کے روز ومبلڈن کے ایک میچ کے دوران دلچپس واقعہ اس وقت دیکھا گیا جب تین مرتبہ کی گرینڈ سلیم جیتنے والی کم کلائسٹرز نے میچ دیکھنے والے ایک تماشائی کو کورٹ پر آنے کی دعوت دی۔

میڈیا رپورٹس کے مطابق کرس کوئین نامی شخص کم کو سرو کرنے کے حوالے سے مشورے دے رہے تھے جس کے بعد ٹینس اسٹار نے انہیں کورٹ پر ان کی سرو کا سامنا کرنے کا چیلنج دیا۔

اس موقع پر کم کے مخالف کھیلنے والی کھلاڑی نے بھی ان کا ساتھ دیا اور اپنا ریکٹ کرس کو تھما دیا۔

تاہم دیگر شائقین کی جانب سے اس بات کی نشاندہی کی گئی کہ ومبلڈن قوانین کے مطابق تمام کھلاڑیوں کو سفید رنگ کا لباس پہن کر میچ کھیلنا ہوتا ہے جس پر کم نے اپنی ایک اسکرٹ کرس کو پہنادی تاہم ایسا کرتے ہوئے وہ خود پر قابو نہ رکھ سکیں اور ہنستے ہنستے کورٹ پر ہی لوٹ پوٹ ہوگئیں۔

پھر وہی ہوا جس کی تمام شائقین توقع کررہے تھے۔ کرس کم کی سرو کو کھیلنے میں بری طرح ناکام ہوئے۔ وہ کسی طرح پہلی سرو جو جھیل گئے تاہم دوسری سرو کس تیزی سے ان کے برابر سے نکل گئی انہیں اس کا اندازہ تک نہ ہوا۔

بعدازاں تمام کھلاڑیوں اور کرس نے مل کر ایک یادگار تصویر بھی کھینچی۔

مزید خبریں :