کراچی … پاکستان اور انگلینڈ کے درمیان ٹیسٹ سیریز کا آخری میچ کل سے شروع ہورہا ہے، لیکن تاحال اس سیریز میں کسی بھی ٹیم سے کوئی بھی بیٹسمین سنچری اسکور نہ کرسکا،پاکستان اور انگلینڈ کے درمیان سیریزمیں اب تک بولرز خصوصاً اسپنرز کا راج رہا، انگلش کھلاڑیوں کو دوسرے،تیسرے کے چکر میں الجھانے والے سعید اجمل 17 وکٹوں کے ساتھ سب سے آگے ہیں تو بائیں ہاتھ سے انگلش ٹیم کا کام تمام کرنیوالے عبدالرحمن کا دوسرا نمبر ہے۔ ان دونوں کے پیچھے کھڑے ہیں گریم سوان۔ سعیداجمل کے علاوہ کوئی بولر میچ میں 10 وکٹیں حاصل نہیں کرسکا جبکہ کسی فاسٹ بولر کو اننگز میں 5 وکٹیں نہیں مل سکیں۔ بیٹسمینوں کیلئے یہ سیریز کڑا امتحان ثابت ہوئی ہے،کیونکہ کوئی بھی کھلاڑی اب تک 200 رنزبھی نہیں بناسکا، جبکہ کسی کوسنچری بنانا بھی نصیب نہیں ہوا۔ سیریز میں 2 نصف سنچریاں بنانے کا موقع بھی صرف پاکستانی کپتان مصباح الحق کو ہی مل سکا ہے۔ دیکھنا یہ ہے کہ سیریز میں پہلی سنچری کون بناتا ہے اور 10 وکٹیں کس فاسٹ بولر کے حصے میں آتی ہیں۔