دنیا
17 جولائی ، 2012
17 جولائی ، 2012 
فرانسیسی فوجیوں کی ہلاکت، افغان فوجی کو سزائے موت کا حکم
17 جولائی ، 2012
کابل …افغانستان کی فوجی عدالت نے چار فرانسیسی فوجیوں کو گولی مار کر ہلاک کرنے کے جرم میں افغان فوجی کو سزائے موت کا حکم دیا ہے۔ فرانسیسی خبر رساں ایجنسی کے مطابق افغان فوجی اہلکار عبدالصبور نے رواں سال جنوری میں شمالی صوبہ کپیسا میں فائرنگ کر کے چار فرانسیسی فوجیوں کو ہلاک اور 15 کو زخمی کر دیا تھا۔ مذکورہ فوجی اہلکار کو کابل کے پل چرخی جیل میں فوجی عدالت نے پھانسی کی سزا کا حکم دیا۔ افغان وزارت دفاع کے ایک ترجمان محمد ظاہر عظیمی نے فوجی اہلکار کو پھانسی دینے کی سزا تصدیق کی ہے۔ واضح رہے کہ اس واقعہ کے بعد فرانس نے افغانستان سے فوجی انخلاء کے عمل کو تیز کرنے کیلئے کئی اقدامات کئے تھے۔
