بٹ کوائن کرنسی کی مالیت میں 50 فیصد سے زائد کمی

پاکستان سمیت دنیا بھر میں تیزی سے مقبول ہوتی ڈجیٹل کرنسی بٹ کوائن کے شیئرز کی مالیت میں 50 فیصد کمی دیکھنے میں آئی ہے اور گزشتہ ماہ ہی اپنی تاریخ کی بلند ترین سطح پر پہنچنے والی ڈجیٹل کرنسی کی مالیت 10 ہزار ڈالرز سے بھی نیچے آ گئی ہے۔

غیرملکی خبر رساں ادارے کی رپورٹ کے مطابق بٹ کوائن کے شیئر کی مالیت 9807.56 ڈالرز پر ریکارڈ کی گئی جو یکم دسمبر کے بعد ڈجیٹل کرنسی میں تقریباً 50 فیصد کمی ہے۔

بلوم برگ کی رپورٹ کے مطابق بٹ کوائن کرنسی کے شیئر کی مالیت گزشتہ برس 18 دسمبر کو اپنی تاریخ کی بلند ترین سطح پر ریکارڈ کی گئی تھی۔

بٹ کوائن کرنسی کی سائنس: کیا اس میں انویسٹمنٹ کرنی چاہیے؟

آج کی سب سے زیادہ کامیاب ڈیجیٹل کرنسی یعنی 1 بٹ کوائن 4000 برطانوی پاؤنڈ سے زیادہ کا ہے۔

اسٹاک مارکیٹ کے ایک سینئر تجزیہ کار کا کہنا ہے کہ گزشتہ برس ہی اس بات کے واضح امکانات تھے کہ بٹ کوائن کرنسی کی قیمت میں گراوٹ آئے گی جو اُن لوگوں کے لیے بہت ہی بری خبر ہو گی جو یہ سوچ رہے تھے کہ اس طریقے سے وہ بہت آسانی سے پیسہ بنا سکتے ہیں۔

بٹ کوائن کی مالیت گزشتہ برس دسمبر کے آخری ہفتے میں 20 ہزار ڈالر تک پہنچی تھی اور اس حوالے سے خدشات سے قبل 2017 میں اس کی قیمت میں 25 گنا اضافہ دیکھنے میں آیا تھا۔

ایک اور معاشی تجزیہ کار کا کہنا تھا کہ بڑی کرپٹو کرنسیز کی مالیت میں آنے والی گراوٹ کو جنوبی کوریا کی جانب سے اس پر پابندی سے جوڑا جا سکتا ہے۔