26 مئی ، 2018 
پاکستان
نامکمل دستاویزات: وزیراعلیٰ خیبر پختونخوا کی اہلیہ کو امریکا جانے سے روک دیا گیا
26 مئی ، 2018
وزیر اعلیٰ خیبر پختونخوا پرویز خٹک کی اہلیہ عامرہ خٹک کو امریکہ جاتے ہوئے سفری دستاویزات مکمل نہ ہونے پر باچا خان ایئرپورٹ پر روک لیا گیا۔
نمائندہ جیوز نیوز کے مطابق وزیراعلیٰ کی اہلیہ عامرہ خٹک امریکی پاسپورٹ پر سفر کرنا چاہتی تھیں اور غیرملکی ایئر لائن کے ذریعے امریکا ہی جا رہی تھیں کہ ایف آئی حکام نے سفری دستاویزات مکمل نہ ہونے پر ایئرپورٹ پر روکا۔
ایئرپورٹ ذرائع کے مطابق وزیر اعلیٰ کی اہلیہ کے پاس اوورسیز پاکستانی قومی شناختی کارڈ (این آئی سی او پی) نہیں تھا جس کے باعث انہیں آف لوڈ کیا گیا۔
عامرہ خٹک نے سفر کی اجازت نہ ملنے پر حکام سے بحث و تکرار بھی کی لیکن اس کے باوجود جانے نہیں دیا گیا جس کے بعد وہ ایئرپورٹ سے واپسی گھر روانہ ہوگئیں۔
