گلاب جامن کو 'انڈین فرائیڈ ڈونٹس' کیوں کہا؟ ٹوئٹر صارفین ناراض

امریکی ویب سائٹ 'بز فیڈ' کی موبائل فوڈ ایپ پر پاکستان اور بھارت میں یکساں مقبول مٹھائی 'گلاب جامن' کا غلط نام استعمال کرنے پر صارفین بھڑک اٹھے۔

دراصل گزشتہ برس بزفیڈ کی موبائل ایپ 'ٹیسٹی' نے اپنے ٹوئٹر اکاؤنٹ پر گلاب جامن کو ’انڈین فرائیڈ ڈونٹس‘ کا نام دیتے ہوئے اس کی ترکیب بتائی تھی۔

 تاہم 30 جون 2017 کو پوسٹ کی گئی یہ ویڈیو حال ہی میں سوشل میڈیا پر وائرل ہوئی، جو پاکستانی و بھارتی صارفین کو ناراض کرگئی اور انہوں نے ٹوئٹر پر غم و غصے کا اظہار کرنے کے ساتھ ساتھ مذاق بھی اڑایا۔

صارفین کا کہنا تھا کہ 'یہ ہماری روایتی میٹھے کی تذلیل ہے، اس مٹھائی کا نام گلاب جامن ہے اور انگریز اسے تبدیل کر رہے ہیں، ہم تو ان کے کھانوں کے نام تبدیل نہیں کرتے'۔

کچھ صارفین نے مغربی ممالک کی ڈشز کے بھی الٹے سیدھے نام پوسٹ کیے اور پزا کو 'چیز چپاتی' اور کورنش پیسٹری کو 'انگریزی سموسے' کا نام دیا۔

جبکہ ایک صارف نے لکھا کہ 'جو سلوک ہم انگریزی کے ساتھ کرتے ہیں، بالکل وہی سلوک انہوں نے ہماری ڈش کے ساتھ بھی کیا ہے، حساب برابر ہوا'۔