01 جون ، 2018 
تحریک انصاف کی جانب سے ناصر کھوسہ کے نام سے دستبردار ہونے کی اندرونی کہانی
01 جون ، 2018
پاکستان تحریک انصاف کی جانب سے نگراں وزیراعلیٰ پنجاب کے لیے ناصر محمود کھوسہ کے نام پر اتفاق کے بعد ان کے نام سے دستبردار ہونے کی اندرونی کہانی جیو نیوز نے پتہ لگا لی۔
ذرائع کے مطابق ناصر محمود کھوسہ کے نام پر شہباز شریف کے متفق ہونے پر تحریک انصاف میں بےچینی پیدا ہوئی۔
ذرائع کا کہنا ہے کہ اپوزیشن لیڈرمحمودالرشید نے ناصرکھوسہ سے ازخود دستبردار ہونے کی درخواست کی اور کہا کہ مجھ پر پارٹی کا دباؤ ہے اس لیے آپ ہی معذرت کر لیں۔
ذرائع کا بتانا ہے کہ محمود الرشید نے دستبردار نہ ہونے کی صورت میں ناصر کھوسہ کو نام واپس لینے کا پیغام بھی دیا۔
ذرائع کے مطابق ناصر کھوسہ کے انکار پر پی ٹی آئی قیادت نے محمود الرشید کو ان کا نام واپس لینے کی ہدایت کی اور معاملے کی تمام ذمہ داری اپنے سر لینے کا کہا۔
ذرائع کا بتانا ہے کہ محمود الرشید پر پارٹی قیادت کی طرف سے دباؤ بھی ڈالا گیا تاہم محمود الرشید نے ملبہ ڈالے جانے پر کورکمیٹی ارکان کو احتجاج کی دھمکی بھی دی۔
ذرائع کا کہنا ہے کہ عمران خان نے محمودالرشید کوغصہ نہ کرنے کا مشورہ دیا کیونکہ عمران خان نے ہی ناصر کھوسہ کا نام بطور نگراں وزیراعلیٰ محمود الرشید کو دیا تھا۔
ذرائع کا یہ بھی بتانا ہے کہ تحریک انصاف کی کور کمیٹی نے بعد میں ملبہ محمودالرشید پر ڈالتے ہوئے موقف ہی بدل لیا۔
خیال رہے کہ پاکستان تحریک انصاف نے نگراں وزیراعلیٰ پنجاب کے لیے ناصر محمود کھوسہ کا نام تجویز کیا تھا جسے وزیراعلیٰ پنجاب شہباز شریف نے بھی قبول کر لیا تھا۔
بعد ازاں تحریک انصاف کی اعلیٰ قیادت سے مشورے کے بعد محمود الرشید نے ناصر کھوسہ کی جگہ نگراں وزیراعلیٰ پنجاب کے لیے مزید نام پیش کیے۔
