26 جون ، 2018 
کراچی: کورنگی میں نامعلوم افراد کا خواجہ سرا پر تیز دھار آلے سے حملہ
26 جون ، 2018
کراچی: شہرِ قائد کے علاقے کورنگی میں نامعلوم ملزمان نے ایک خواجہ سرا کو پتھروں اور تیز دھار آلے سے زخمی کردیا۔
متاثرہ خواجہ سرا کی شناخت خوشی کے نام سے ہوئی۔
خوشی کے دوست نیشا کے مطابق کورنگی بلال کالونی میں نامعلوم ملزمان نے خوشی کے گھر میں داخل ہوکر اس پر پتھروں سے حملہ کیا اور پھر تیز دھار آلے سے زخمی کردیا۔
خواجہ سرا خوشی کو زخمی حالت میں جناح اسپتال منتقل کردیا گیا۔
رواں برس ملک کے مختلف علاقوں میں خواجہ سراؤں پر حملے کے متعدد واقعات سامنے آئے ہیں۔
رواں برس مارچ میں خیبرپختونخوا کے دارالحکومت پشاور میں نامعلوم موٹر سائیکل سواروں کی فائرنگ کے نتیجے میں ایک خواجہ سرا اپنے ساتھی سمیت جاں بحق ہوگیا تھا۔
اس سے قبل فروری میں بھی صوبہ پنجاب کے شہر راولپنڈی میں دوستی نہ کرنے پر نشے میں دھت ایک شخص نے خواجہ سرا کو فائرنگ کرکے شدید زخمی کر دیا تھا۔
