ایشیا کپ میں پاکستان نے ہانگ کانگ کو 8 وکٹوں سے شکست دیدی

دبئی: ایشیا کپ کرکٹ ٹورنامنٹ کے دوسرے میچ پاکستان نے ہانگ کانگ کو شکست دیدی۔ 

دبئی کے انٹرنیشنل کرکٹ اسٹیڈیم میں کھیلے گئے میچ میں پاکستان نے ہانگ کانگ کی جانب سے دیا گیا 117 رنز کا ہدف دو وکٹوں کے نقصان پر پورا کر لیا۔

پاکستان کی جانب سے اننگز کا آغاز فخر زمان اور امام الحق نے کیا لیکن 41 کے مجموعی اسکور پر فخر زمان 24 رنز بنا کر وکٹوں کے پیچھے کیچ آؤٹ ہو گئے۔

فخر زمان کے آؤٹ ہونے کے بعد امام الحق اور بابر اعظم کے درمیان 52 رنز کی شراکت ہوئی اور 93 کے اسکور پر بابر اعظم احسان خان کی گیند پر وکٹوں کے پیچھے کیچ آؤٹ ہو گئے۔

امام الحق نے شاندار بلے بازی کا سلسلہ جاری رکھتے ہوئے اپنی ففٹی مکمل کی اور 50 رنز بنا کر ناٹ آؤٹ رہے۔

پاکستان کو جیت کے لیے ایک رن درکار تھا لیکن شعیب ملک نے چوکا لگا کر ووننگ اسٹروک کھیلا۔

بابر اعظم کے تیز ترین دو ہزار رنز

ہانگ کانگ کے خلاف کھیلتے ہوئے پاکستانی بلے باز بابر اعظم نے 45 ویں اننگز میں 2 ہزار رنگ بنانے کا اعزاز اپنے نام کیا اور اس طرح وہ جنوبی افریقا کے ہاشم آملہ کے بعد تیز ترین 2 ہزار رن بنانے دوسرے بلے باز بن گئے۔

بابر اعظم کے علاوہ 45 اننگز میں تیز ترین 2 ہزار رنز مکمل کرنے کا اعزاز ایشین ڈان بریڈ مین ظہیر عباس، کیون پیٹرسن اور جوناتھن ٹروٹ کو بھی حاصل ہے۔

قبل ازیں دبئی انٹرنیشنل کرکٹ اسٹیڈیم میں ہانگ کانگ کے کپتان انوشمان رتھ نے ٹاس جیت کر پہلے بیٹنگ کا فیصلہ کیا۔

ہانگ کانگ کی پہلی وکٹ 17 کے مجموعی اسکور پر گری جب نزاکت خان 13 رنز بنا کر آؤٹ ہوئے اور پھر اس کے بعد وقفے وقفے سے وکٹیں گرنے کا سلسلہ جاری رہا۔

پاکستان کے اچھے بالنگ اٹیک کے سامنے ہانگ کانگ کی پوری ٹیم 38 ویں اوور میں 116 رنز ہی بنا سکی۔ اعزاز خان 27 اور کنچت شاہ 26 رنز بنا کر نمایاں بلے باز رہے۔

پاکستان کی جانب سے عثمان شنواری نے 3 جب کہ شاداب خان اور حسن علی نے دو، دو کھلاڑیوں کو آؤٹ کیا۔ ایک وکٹ فہیم اشرف کے حصے میں آئی جب کہ دو کھلاڑی رن آؤٹ ہوئے۔

قبل ازیں قومی ٹیم کے کپتان سرفراز احمد کا کہنا تھا کہ اگر ٹاس جیت جاتے تو پہلے بیٹنگ ہی کرتے تاہم مخالف ٹیم کو جلد آؤٹ کرنے کی کوشش کریں گے۔

سرفراز احمد نے کہا کہ فائنل تک پہنچنے کے لیے 6 میں سے 5 میچز لازمی جیتنا ہوں گے، ٹورنامنٹ بہت اہم ہے کچھ نہیں کہہ سکتے کون جیتے گا تاہم ایشیا کپ جیتنے کی بھرپور کوشش کریں گے ۔

قومی ٹیم کے کپتان کا کہنا تھا کہ ہانگ کانگ کی ٹیم نے ایونٹ کے لیے کوالیفائی کیا، یہ ان کے لیے بڑا ایونٹ ہے، آج 4 فاسٹ بالرز اور  ایک اسپنر کے ساتھ کھیلیں گے۔

ہانگ کانگ کے خلاف قومی ٹیم فخر زمان، امام الحق، بابراعظم، شعیب ملک، کپتان سرفراز احمد، آصف علی، شاداب خان، فہیم اشرف، محمد عامر، حسن علی اور عثمان خان پر مشتمل ہے۔

ہانگ کانگ کی ٹیم کپتان انوشمان رتھ، بابر حیات، نزاکت خان، تنویر افضل، اعزاز خان، کرسٹوفر کارٹر، ندیم احمد، اسکوٹ مکینی، احسن خان، احسان نواز اور کنچٹ شاہ پر مشتمل ہے۔

دبئی کا موسم شدید گرم ہے اور درجہ حرارت 45 ڈگری سینٹی گریڈ تک ریکارڈ کیا گیا ہے تاہم پچ بیٹنگ کے لیے سازگار ہے۔

ہانگ کانگ کی ایشیا کپ میں تیسری مرتبہ شرکت

ہانگ کانگ کی ٹیم تیسری مرتبہ ایشیا کپ میں شرکت کررہی ہے، پہلی مرتبہ اس نے 2004 میں سری لنکا میں کھیلے گئے ایشیا کپ میں شرکت کی اور اس کے بعد 2008 میں پاکستان میں منعقدہ ٹورنامنٹ میں حصہ لیا تھا تاہم دونوں مرتبہ وہ کسی میچ میں کامیابی حاصل نہیں کرسکی۔

پاکستان اور ہانگ کانگ کے درمیان دو ون ڈے انٹرنیشنل میچز بھی کھیلے جاچکے ہیں اور دونوں ہی میچوں میں اسے شکست کا سامنا کرنا پڑا اور ایک مرتبہ پھر آئی سی سی نے ایشیا کپ میں ہانگ کانگ کے میچوں کو بین الاقوامی میچوں کا درجہ دے رکھا ہے۔

یاد رہے کہ گزشتہ روز کھیلے گئے ٹورنامنٹ کے افتتاحی میچ میں بنگال ٹائیگرز نے سری لنکا کو 137 رن سے ہرا دیا تھا۔