آسٹریلیا کیخلاف دوسرا ٹیسٹ؛ فخر زمان اور میر حمزہ کو ٹیسٹ کیپ ملنے کا امکان

اس بات کے روشن امکان ہیں کہ آسٹریلیا کے خلاف شیخ زاید اسٹیڈیم ابوظہبی ٹیسٹ میں پاکستانی ٹیم انتظامیہ اوپنر فخر زمان اور فاسٹ بولر میر حمزہ کو ٹیسٹ کیپ دے گی۔

فخر زمان ایشیا کپ میں بری طرح ناکام ہوئے تھے جبکہ لیفٹ آرم فاسٹ بولر میر حمزہ پہلی بار پاکستان کے لیے انٹر نیشنل میچ کھیلیں گے۔

پاکستانی ٹیم دوسرا ٹیسٹ کھیلنے دبئی سے ابوظہبی پہنچ چکی ہے، ہفتے کو فخر زمان پریکٹس کیلئے گراؤنڈ پہنچے۔ دونوں ٹیموں کے درمیان پہلا ٹیسٹ سنسنی خیز مقابلے کے بعد ڈرا ہو گیا تھا۔

پاکستانی ٹیم دوسرے ٹیسٹ سے قبل اتوار کو شیخ زاید اسٹیڈیم میں پہلے پریکٹس سیشن میں شرکت کرے گی۔ ذرائع کا کہنا ہے کہ زخمی امام الحق کی جگہ اننگز کا آغاز فخر زمان اور محمد حفیظ کریں گے جبکہ آؤٹ آف فارم فاسٹ بولر وہاب ریاض کی جگہ میر حمزہ لیں گے۔

وہاب ریاض نے دبئی ٹیسٹ کی پہلی اننگز میں 11 اوورز میں 39 رنز اور دوسری اننگز میں16 اوورز میں 42 رنز دیے تھے لیکن دونوں اننگز میں وہ وکٹ حاصل نہیں کرسکے تھے۔

امام الحق نے پہلی اننگز میں76رنز بنائے تھے اور محمد حفیظ کے ساتھ پہلی وکٹ پر ریکارڈ205 رنز کی شراکت قائم کی تھی۔

دوسری اننگز میں امام الحق نے48 رنز بنائے تھے۔ 28سالہ فخر زمان پاکستان کی جانب سے23 ون ڈے اور22 ٹی ٹوئنٹی انٹرنیشنل میچز کھیل چکے ہیں۔

ایشیا کپ میں فخر زمان ہانگ کانگ کے خلاف 24 اور بھارت کے خلاف 31 رنز بناسکے تھے۔ دو میچوں میں وہ صفر پر آؤٹ ہوئے تھے۔ ایشیا کپ کی ناکامی کے باوجود انتظامیہ فخر زمان کو ٹیم کے ساتھ رکھ رہی ہے۔

26 سالہ میر حمزہ کا تعلق کراچی کے علاقے میٹروول سائٹ سے ہے اور وہ پاکستان کی جانب سے پہلا ٹیسٹ کھیلیں گے۔ تاہم وہ 56 فرسٹ کلاس میچز میں 278 وکٹیں حاصل کر چکے ہیں۔

حسن علی اور فہیم اشرف کی موجودگی میں ٹیم انتظامیہ میر حمزہ کو اہمیت دے رہی ہے۔