09 نومبر ، 2018 
کوئٹہ میں ماں بیٹی پر تیزاب پھینکنے کے واقعے کا ڈراپ سین
09 نومبر ، 2018
کوئٹہ کے علاقے بروری روڈ پر ماں بیٹی پر تیزاب پھینکنے کے واقعے کا ڈراپ سین ہوگیا اور واقعے میں ملوث ملزمہ متاثرہ لڑکی کی چھوٹی بہن ہی نکلی جب کہ لڑکی کے دوست سمیت تین ملزمان کو گرفتار کرلیا گیا۔
کوئٹہ کے علاقے بروری روڈ پر 26 اکتوبر کو ایک خاتون اور اس کی بیٹی پر تیزاب پھینکے جانے کا واقعہ پیش آیا تھا جس میں دونوں ماں بیٹی جھلس کر زخمی ہوگئیں تھیں۔
واقعے میں ملوث دو ملزمان فرار ہوگئے تھے تاہم پولیس نے واقعے کی تحقیقات جاری رکھی اور گزشتہ روز تفتیش کے دوران موبائل فون ڈیٹا کی مدد سے اعجاز نامی شخص کو گرفتار کیا۔
ملزم اعجاز کی گرفتاری کے بعد ساری حقیقت سامنے آئی۔ ماجرا یہ ہے کہ تیزاب گردی کا نشانہ بننے والی لڑکی کرن اور ملزم اعجاز کی شادی طے تھی۔
کرن کی چھوٹی بہن ارم، ملزم اعجاز کو پسند کرنے لگی تھی اور اسی نے ملزم کو خودکشی کی دھمکی دے کر اس کام پر اکسایا تھا۔
ملزمہ ارم نے اعجاز کو اپنی بہن کرن سے شادی نہ کرنے پر مجبور کیا اور اس کا چہرہ خراب کرنے کیلئے اس پر تیزاب پھینکوادیا۔
ملزمان کے بیان کے مطابق ان کا ارادہ صرف بڑی بہن کو ڈرانا تھا جس کیلئے اعجاز نے اپنے ایک دوست عبداللہ کی مدد سے کرن اور اس کی والدہ پر تیزاب پھینکا۔
پولیس نے تیزاب پھینکنے والے نوجوان عبداللہ کو پہلئ نوشکی سے اور بعد میں اس کی نشاندہی پر متاثرہ لڑکی کی چھوٹی بہن اور اس کے مبینہ دوست اعجاز کو بھی کوئٹہ کے نواحی علاقے سے گرفتار کیا۔
