جعلی اکاؤنٹس کیس: چیئرمین اوورسیز کوآپریٹو سوسائٹی اعجاز ہارون گرفتار

اسلام آباد: جعلی اکاؤنٹس کیس میں چیئرمین اوورسیز کوآپریٹو سوسائٹی اعجاز ہارون کو گرفتار کر لیا گیا۔

قومی احتساب بیورو (نیب) راولپنڈی کی جانب سے جاری بیان کے مطابق ملزم اعجاز ہارون نے 12 جعلی پلاٹس بنائے اور جعلی الاٹیوں کو الاٹ کیے، ملزم اعجاز نے 12 جعلی پلاٹس کی آڑ میں اومنی گروپ کیلئے 14 کروڑ 40 لاکھ روپے کی منی لانڈرنگ بھی کی، یہ رقم دو جعلی بینک اکاؤنٹس کے ذریعے بیرون ملک منتقل کی گئی۔

پی آئی اے کے سابق سربراہ اعجاز ہارون سابق صدر آصف علی زرداری کے قریبی ساتھی کے طور پر جانے جاتے ہیں اور ان دنوں ایک نجی ہاؤسنگ سوسائٹی کے سربراہ کی حیثیت سے کام کررہے تھے ۔

جعلی بینک اکاؤنٹس کیس کا پس منظر

وفاقی تحقیقاتی ایجنسی (ایف آئی اے) حکام کا کہنا ہے کہ منی لانڈنگ کیس 2015 میں پہلی دفعہ اسٹیٹ بینک کی جانب سے اٹھایا گیا، اسٹیٹ بینک کی جانب سے ایف آئی اے کو مشکوک ترسیلات کی رپورٹ یعنی ایس ٹی آرز بھیجی گئیں۔

نیب کا جعلی اکاؤنٹس کیس میں بڑی کامیابی کا دعویٰ

جعلی اکاؤنٹس کیس میں آصف زرداری، فریال تالپور اور اومنی گروپ کے عبدالغنی مجید سمیت اہم ملزمان نامزد ہیں۔

حکام کے دعوے کے مطابق جعلی اکاؤنٹس بینک منیجرز نے انتظامیہ اور انتظامیہ نے اومنی گروپ کے کہنے پر کھولے اور یہ تمام اکاؤنٹس 2013 سے 2015 کے دوران 6 سے 10 مہینوں کے لیے کھولے گئے جن کے ذریعے منی لانڈرنگ کی گئی اور دستیاب دستاویزات کے مطابق منی لانڈرنگ کی رقم 35ارب روپے ہے۔

مشکوک ترسیلات کی رپورٹ پر ڈائریکٹر ایف آئی اے سندھ کے حکم پر انکوائری ہوئی اور مارچ 2015 میں چار بینک اکاؤنٹس مشکوک ترسیلات میں ملوث پائے گئے۔

ایف آئی اے حکام کے دعوے کے مطابق تمام بینک اکاؤنٹس اومنی گروپ کے پائے گئے، انکوائری میں مقدمہ درج کرنے کی سفارش ہوئی تاہم مبینہ طور پر دباؤ کے باعث اس وقت کوئی مقدمہ نہ ہوا بلکہ انکوائری بھی روک دی گئی۔

جعلی اکاؤنٹس کیس: راہداری ریمانڈ منظور، فریال تالپور اسلام آباد سے کراچی منتقل

صوبائی وزیر صحت فریال تالپور کو کراچی میں ان کی رہائشگاہ پر رکھا جائے گا، فریال تالپور کو بروز منگل سندھ اسمبلی کے اجلاس میں شرکت کے لیے لایا جائے گا۔

دسمبر 2017 میں ایک بار پھر اسٹیٹ بینک آف پاکستان کی جانب سے ایس ٹی آرز بھیجی گئیں، اس رپورٹ میں مشکوک ترسیلات جن اکاؤنٹس سے ہوئی ان کی تعداد 29 تھی جس میں سے سمٹ بینک کے 16، سندھ بینک کے 8 اور یو بی ایل کے 5 اکاؤنٹس ہیں۔

ان 29 اکاؤنٹس میں 2015 میں بھیجی گئی ایس ٹی آرز والے چار اکاؤنٹس بھی شامل تھے۔ 21 جنوری 2018 کو ایک بار پھر انکوائری کا آغاز کیا گیا۔

جعلی اکاؤنٹس کیس: نیب نے فریال تالپور کو گرفتار کرلیا

نیب نے سابق صدر آصف زرداری کی ہمشیرہ کو اسلام آباد میں ان کی رہائش گاہ سے گرفتار کیا، انہیں نیب دفتر کی بجائے ان کی رہائش گاہ پر رکھا جائے گا جسے سب جیل قرار دیا گیا ہے۔

تحقیقات میں ابتداء میں صرف بینک ملازمین سے پوچھ گچھ کی گئی، انکوائری کے بعد زین ملک، اسلم مسعود، عارف خان، حسین لوائی، ناصر لوتاہ، طحٰہ رضا، انور مجید، اے جی مجید سمیت دیگر کو نوٹس جاری کیے گئے جبکہ ان کا نام اسٹاپ لسٹ میں بھی ڈالا گیا۔

ایف آئی اے حکام کے مطابق تمام بینکوں سے ریکارڈ طلب کیے گئے لیکن انہیں ریکارڈ نہیں دیا گیا، سمٹ بینک نے صرف ایک اکاؤنٹ اے ون انٹرنیشنل کا ریکارڈ فراہم کیا جس پر مقدمہ درج کیا گیا۔

نیب نے جعلی اکاؤنٹس کیس میں آصف زرداری کو گرفتار کرلیا

اسلام آباد ہائیکورٹ کی جانب سے درخواست ضمانت مسترد کیے جانے کے بعد نیب ٹیم نے آصف زرداری کو حراست میں لیا، انہیں آج احتساب عدالت میں پیش کیا جائے گا

حکام نے مزید بتایا کہ اسٹیٹ بینک کی جانب سے سمٹ بنک کو ایکوٹی جمع کروانے کا نوٹس دیا گیا، سمٹ بینک کے چیئرمین ناصر لوتاہ کے اکاؤنٹس میں 7 ارب روپے بھیجے گئے، یہ رقم اے ون انٹرنیشنل کے اکاؤنٹ سے ناصر لوتاہ کے اکاونٹ میں بھیجی گئی تھی۔

ناصر لوتاہ نے یہ رقم ایکوٹی کے طور پر اسٹیٹ بینک میں جمع کروائی، ان 29 اکاؤنٹس میں 2 سے 3 کمپنیاں اور کچھ شخصیات رقم جمع کرواتی رہیں۔

حکام نے بتایا کہ تحقیقات کے بعد ایسا لگتا ہے کہ جو رقم جمع کروائی گئی وہ ناجائز ذرائع سے حاصل کی گئی، ان تمام تحقیقات کے بعد جعلی اکاؤنٹس اور منی لانڈرنگ کا مقدمہ درج کرنے کا فیصلہ کیا گیا۔

منی لانڈرنگ کیس: جے آئی ٹی کی زرداری گروپ کی جائیدادیں منجمد کرنے کی سفارش

جے آئی ٹی نے زرداری گروپ کی 37 جائیدادیں منجمد کرنے کی سفارش کی ہے جس میں بلاول ہاؤس کراچی، لاہور اور زرداری ہاؤس اسلام آباد بھی شامل ہیں: ذرائع

اومنی گروپ کے مالک انور مجید اور سمٹ بینک انتظامیہ پر جعلی اکاؤنٹس اور منی لاڈرنگ کا مقدمہ کیا گیا جبکہ دیگر افراد کو منی لانڈرنگ کی دفعات کے تحت اسی مقدمے میں شامل کیا گیا۔

معاملہ سپریم کورٹ تک پہنچا تو اعلیٰ عدالت نے اس کی تحقیقات کے لیے مشترکہ تحقیقاتی ٹیم ( جے آئی ٹی) تشکیل دی جس نے  24 دسمبر 2018 کو عدالت عظمیٰ میں اپنی رپورٹ جمع کرائی جس میں 172 افراد کے نام سامنے آئے۔

جے آئی ٹی نے سابق صدر آصف علی زرداری اور اومنی گروپ کو جعلی اکاؤنٹس کے ذریعے فوائد حاصل کرنے کا ذمہ دار قرار دیا اور ان کے نام ای سی ایل میں ڈالنے کی سفارش کی۔

جعلی اکاؤنٹس کیس میں سابق صدر آصف علی زرداری ان کی ہمشیرہ فریال تالپور اور دیگر اہم شخصیات زیر حراست ہیں۔