16 اپریل ، 2020
وفاقی وزیر برائے سائنس اینڈ ٹیکنالوجی فواد چوہدری کا کہنا ہے کہ اب پاکستان میں رنگ برنگے سوئچز اور بورڈ فروخت نہیں ہو سکیں گے۔
فواد چوہدری نے سوشل میڈیا پر اپنے ٹوئٹ میں کہا کہ وزارت سائنس نے الیکٹرونکس کے 61 اسٹینڈرڈز کی منظوری دیدی ہے، کابینہ کی منظوری کے بعد یہ معیار نافذالعمل ہوں گے۔
انہوں نے بتایا کہ کابینہ کی منظوری کا مطلب یہ ہو گا کہ پاکستان میں رنگ برنگے سوئچز اور بورڈز درآمد نہیں ہو سکیں گے، الیکٹرونکس کی صرف معیاری مصنوعات ہی پاکستان میں فروخت ہو سکیں گی۔
وفاقی وزیر نے کہا کہ پاکستان میں بننے والی گاڑیوں اور ٹریکٹرز کے اسٹینڈرز بھی اپ گریڈ کریں گے، اگر ہم نے دنیا میں آگے جانا ہے تو معیار بنانے اور ان پر عمل کرنا ہو گا۔
فواد چوہدری نے کہا کہ انڈسٹریز کا تعاون انتہائی اہم ہے اور وفاقی وزیر برائے اکنامک افیئرز ڈویژن حماد اظہر نے مکمل تعاون کا یقین دلایا ہے۔