20 جون ، 2020 
گلستان جوہر میں رینجرز پر حملے کے ملزمان کی تصاویر جاری
20 جون ، 2020
کراچی پولیس کے کاؤنٹر ٹیررازم ڈیپارٹمنٹ (سی ٹی ڈی) نے گلستان جوہر میں سندھ رینجرز کی گاڑی پر دستی بم حملہ کرنے والے دو ملزمان کی تصاویر جاری کردیں۔
خیال رہے کہ 10 جون کو گلستان جوہر میں کامران چورنگی کے قریب پنکچر کی ایک دکان پر کھڑی سندھ رینجرز کی موبائل پر موٹر سائیکل سوار ملزمان نے ہینڈ گرنیڈ سے حملہ کیا تھا۔
واقعے کی سی سی ٹی وی فوٹیج حاصل کرلی گئی تھی جس کے بعد سی ٹی ڈی نے دونوں مشتبہ ملزمان کی خاکہ نما تصاویر تیار کرکے میڈیا کے لیے جاری کی ہیں۔
مذکورہ دونوں ملزمان کے حوالے سے اطلاع دینے کے لیے سی ٹی ڈی نے ایک فون نمبر 02199203430 بھی جاری کیا ہے۔
کاؤنٹر ٹیرر ازم ڈیپارٹمنٹ کے تفتیشی افسر راجہ عمر خطاب نے شہریوں سے اپیل کی ہے کہ اگر کوئی شہری ان ملزمان کے بارے میں معلومات رکھتا ہو تو وہ مذکورہ نمبر پر تفتیشی ادارے کو آگاہ کرے۔
انہوں نے کہا کہ ملزمان کی شناخت اور گرفتاری میں مدد دینے والے کا نام صیغہ راز رکھا جائے گا اور ان کی گرفتاری میں مدد دینے والے شہری کو معقول انعام بھی دیا جائے گا۔
واضح رہے کہ رینجرز کی گاڑی پر حملے میں ایک اہکار زخمی ہوا تھا جب کہ ان حملوں میں بھارتی ایجنسی 'را' کے سلیپر سیلز کے ملوث ہونے کا شبہ ہے۔
