11 اگست ، 2020
فلمی دنیا کا سب سے معتبر ایوارڈ آسکر اپنے نام کرنے والی پاکستانی فلم ساز شرمین عبید چنائے کی ایک اور دستاویزی فلم کو 41 ویں ایمی ایوارڈز کے لیے نامزد کرلیا گیا ہے۔
مقبول ترین ٹی وی ایوارڈز فیسٹیول ایمی نے شرمین عبید چنائے کی دستاویزی فلم 'فریڈم فائٹرز' کو 41 ویں سالانہ نیوز اینڈ ڈاکیومنٹری ایوارڈز برائے بیسٹ فیچر اسٹوری ان نیوز میگزین کے لیے نامزد کیا ہے۔
شرمین عبید چنائے کی دستاویزی فلم فریڈم فائٹرز کی کہانی 3 بہادر خواتین پر مبنی ہے جن میں ایک ماضی میں کم عمری کی شادی کا شکار، ایک پولیس افسر اور ایک مزدوری کی جنگ کرنے والی خاتون ہیں جو عدم مساوات کے خلاف آواز اٹھاتی ہیں اور ملک میں یکساں حقوق پر زور دیتی ہیں۔
اس دستاویزی فلم کی ہدایات کار ماہین صادق ہیں جب کہ یہ فلم ایس او سی فلمز نے سینٹر فار انویسٹیگیٹو جرنلزم کے لیے پروڈیوس کی تھی جو ڈاکیومنٹری سیریز کا حصہ تھی۔
اس ڈاکیومنٹری سیریز میں ان 4 خواتین فلم سازوں کے کام کو پیش کیا گیا تھا جو خواتین کے بااختیار ہونے اور مواقع لینے سے متعلق فلمیں بناچکی ہیں۔
خیال رہے کہ کہ اس سے قبل فریڈم فائٹرز ٹالاگراس فلم فیسٹیول میں بہترین دستاویزی فلم کا اعزاز بھی حاصل کرچکی ہے۔
ایمی ایوارڈز کے فاتحین کا اعلان 21 ستمبر کو ورچؤلی یعنی آن لائن تقریب میں کیا جائے گا۔