24 اگست ، 2020 
وزیراعظم عمران خان نے دیپالپور کی خاتون وکیل کے اغواء کا نوٹس لے لیا
24 اگست ، 2020
وزیراعظم عمران خان نے دیپالپور کی خاتون وکیل کے اغواء کا نوٹس لے لیا۔
متاثرہ خاتون ایڈووکیٹ نسرین ارشاد نے سوشل میڈیا پر وائرل ویڈیو میں کہا ہے کہ انہیں دیپالپور کچہری میں ایک وکیل کے دفتر سے 14 اگست کو اغواء کیا گیا تھا۔
انہوں نے بتایا کہ نامعلوم افراد نے کئی دن حبس بے جا میں رکھا اور پھر میلسی میں سڑک کنارے پھینک دیا، وہ نہیں جانتیں کہ اغواء کار کون تھے اور اُن کے کیا عزائم تھے۔
خاتون وکیل ویڈیو سوشل میڈیا پر وائرل ہوئی تو پولیس حرکت میں آئی، خاتون کو میلسی سے تحویل میں لے کر تحصیل ہیڈکوارٹر اسپتال دیپالپور منتقل کر دیا گیا۔
ڈی پی او عمر سعید ملک نے خاتون وکیل کی عیادت کی۔ اُن کا کہنا تھا کہ خاتون کے اغوا کا مقدمہ ان کے بیٹے کی مدعیت میں تھانہ سٹی دیپالپور میں درج تھا جب کہ خاتون کے بیانات کی روشنی میں تفتیش آگے چلے گی۔
آئی جی پنجاب کی ہدایت پرایس پی انویسٹی گیشن شمس الحق کی سربراہی میں دو ڈی ایس پیز پر مشتمل خصوصی انکوائری ٹیم بھی تشکیل دے دی گئی ہے۔
وہیں دوسری جانب وزیراعظم عمران خان نے واقعے کا نوٹس لے لیا ہے۔
وزیراعظم عمران خان کے مشیر برائے امور داخلہ و احتساب شہزاد اکبر کے مطابق وزیراعظم نے واقعے کا نوٹس لیتے ہوئے پنجاب پولیس کو ذمے داروں کے خلاف کارروائی کرنے اور متاثرہ خاتون کی ہر ممکن مدد کی ہدایت کی ہے۔
