دفعہ 144 کے باوجود حب ڈیم کے اسپل وے پکنک پوائنٹ میں تبدیل

حالیہ بارشوں کے بعد کراچی کو پانی سپلائی کرنے والا حب ڈیم مکمل طور پر بھر گیا ہے اور اس کے اسپل ویز سے اضافی پانی کا اخراج جاری ہے۔ 

یہ پانی حب ندی کے راستے سمندر میں شامل ہورہا ہے جبکہ ڈپٹی کمشنر لسبیلہ حسن وقار چیمہ نے حب ڈیم یا اس کے اسپل وے تک عام اور غیر متعلقہ شہریوں کی آمدورفت روکنے کیلئے دفعہ 144 نافذ کررکھی ہے۔

حب ڈیم 13 سال بعد مکمل بھر گیا، اسپل ویز سے پانی کے اخراج کا امکان

حب ڈیم آخری مرتبہ 2007 کی بارشوں کے بعد مکمل بھرا تھا، اسپل ویز سے پانی کے ازخود اخراج سے قبل حب ڈیم کے ہنگامی گیٹ کھولے جا سکتے ہیں

اس کے باوجود شہریوں نے حب ڈیم اور اسپل ویز کو پکنک پوائنٹ بنالیا ہے۔  واپڈا ذرائع کے مطابق کراچی اور ڈیم کے اطراف بلوچستان کے نواحی علاقوں سے روزانہ سیکڑوں افراد پکنک منانے حب ڈیم پہنچ رہے ہیں اور اسپل ویز پر دن بھر میلہ لگا رہتا ہے۔

واپڈا ذرائع کے مطابق ضلعی انتظامیہ کی جانب سے دفعہ 144 کی پابندی پر عمل درآمد نہیں ہورہا جس کی وجہ سے سیکڑوں لوگ صرف اسپل ویز کے نیچے ہی نہا نہیں رہے بلکہ اسپل وے کی دیوار پر بیٹھے اور حب ڈیم کے اندر بھی غوطے لگاتے نظر آرہے ہیں۔

حالیہ بارشوں سے حب ڈیم میں پانی ذخیرہ کرنے کی گنجائش 10 فٹ رہ گئی

جیسے ہی پانی 339 فٹ کی بلندی تک پہنچے گا، انتظامیہ پانی کو ڈیم سے باہر ندی میں خارج کرنا شروع کردے گی: واٹر بورڈ حکام

واپڈا ذرائع کے مطابق اسپل ویز کو نقصان پہنچنے کی صورت میں یک دم 10 لاکھ کیوسک پانی کا اخراج ہوسکتا ہے اور خدانخواستہ کوئی گڑبڑ ہوئی تو سیلابی صورتحال سے حب ڈیم سے گڈانی تک کی آبادی کا صفایا ہوجائے گا۔

ذرائع کے مطابق واپڈا کی سیکیورٹی سیکڑوں لوگوں کو حب ڈیم آنے سے روکنے کیلئے ناکافی ہے۔

ذرائع کے مطابق مقامی لوگ ڈیم پر پکنک منانے والوں کے سہولت کا ربنے ہوئے ہیں، ان کی مدد اور تعلقات کی بنا پر لوگ عام راستے کی بجائے نچلے راستوں سے حب ڈیم یا اسپل وے تک پہنچ جاتے ہیں۔

ذرائع کے مطابق آج بلوچستان پولیس اور لیویز نے ڈیم کا کنٹرول سنبھا لیا ہے اور  واپڈ ذرائع کے مطابق مقامی شہریوں کی جانب سے حب ڈیم پر پکنک کی پابندی پر عملدرآمد کا مطالبہ کیا گیا ہے۔