10 اکتوبر ، 2020 
بی این پی مینگل کا پی ڈی ایم کی حکومت مخالف تحریک میں حصہ لینے کا اعلان
10 اکتوبر ، 2020
بلوچستان نیشنل پارٹی (بی این پی۔ مینگل) کے رہنما سینیٹر جہانزیب جمالدینی نے کہا ہےکہ بی این پی بھی اپوزیشن اتحاد پاکستان ڈیمو کریٹک موومنٹ (پی ڈی ایم) کی حکومت مخالف تحریک میں شامل ہوگی۔
تربت میں پریس کانفرنس کرتے ہوئے سینیٹر جہانزیب جمالدینی کا کہنا تھاکہ وفاقی حکومت کی دوغلی پالیسیوں کی وجہ سے بی این پی نے حکومت سے اپنے راستے الگ کیے، حکومت کو لاپتہ افراد کی بازیابی سمیت 6 نکات پیش کیے تھے، لیکن افسوس کی بات ہے کہ 2 سال میں ہمارے 6 نکات پر کوئی پیش رفت سامنے نہیں آئی۔
بی این پی رہنماکا کہنا تھاکہ ہم نے صوبے کے مختلف اضلاع کی پسماندگی کو ختم کرنے کے لیے وفاق سے 200 ارب روپے کے پیکج کامطالبہ کیا تھا لیکن بلوچستان کے بجائے سندھ اور پنجاب کو پیکج دےدیا گیا، دوسرے صوبے کو ملنے کے خلاف نہیں لیکن بلوچستان کا حق ملناچاہیے۔
ان کا کہنا تھاکہ سندھ اور بلوچستان کے جزائر کو وفاق کے حصے میں شامل کرنے کی باتیں ہو رہی ہیں، اس اقدام کی مذمت کرتے ہیں اور اسے عدالت میں چیلنج بھی کریں گے۔
خیال رہےکہ جون کے وسط میں حکومتی اتحادی جماعت بلوچستان نیشنل پارٹی (مینگل گروپ) نے پاکستان تحریک انصاف کی حکومت کے ساتھ کیےگئے حکومتی اتحاد سے علیحدگی کا اعلان کیا تھا۔
واضح رہے کہ وزیراعظم عمران خان مینگل گروپ کے 4 ارکان کی حمایت سے184 ووٹ لے کر قائد ایوان منتخب ہوئے تھے اور مینگل گروپ کی علیحدگی کے بعد ایوان زیریں میں تحریک انصاف اور اتحادیوں کی کل تعداد 180 ہوگئی ہےجب کہ حکومت برقرار رکھنے کے لیے 172 ارکان کی سادہ اکثریت درکار ہوتی ہے۔
مزید خبریں :
کراچی میں خلع کیسز دائر کرنے کی تعداد دگنا ہوگئی
5 گھنٹے پہلے
لاہور ہائیکورٹ کا عمر قید کے ملزم کو رہا کرنے کا حکم
10 گھنٹے پہلے
