حکومت 120 نئی احتساب عدالتوں کے قیام کا فیصلہ ایک ماہ میں کرے، سپریم کورٹ

سپریم کورٹ نے حکومت کو ایک ماہ میں  120 نئی احتساب عدالتوں کے قیام کا فیصلہ کرنےکا حکم  دے دیا۔

چیف جسٹس پاکستان جسٹس گلزار احمد کی سربراہی میں سپریم کورٹ کے 3 رکنی بینچ نے 120 نئی احتساب عدالتوں کے قیام سے متعلق کیس کی سماعت کی۔

سپریم کورٹ کی 120 نئی احتساب عدالتوں کے قیام کی منظوری کابینہ سے لینے کی ہدایت

نئی عدالتوں کے قیام میں 2.86 ارب کا مسئلہ چوزے کی خوراک کے برابر ہے، نیب مقدمات جیتے تو ہزار ارب سے زائد کی ریکوری ہو سکتی ہے: چیف جسٹس کے ریمارکس

دوران سماعت ایڈیشنل اٹارنی جنرل نےکہا کہ ملک کی تمام24 احتساب عدالتیں فعال ہیں، 120 نئی احتساب عدالتوں کے قیام کا معاملہ وزارت قانون کے پاس ہے۔

چیف جسٹس نے کہا یہ بات تو پچھلی مرتبہ بھی کہی گئی تھی، پیش رفت کیا ہوئی ہے ؟

ایڈیشنل اٹارنی جنرل نے کہا کہ آج ہی اٹارنی جنرل اس معاملے پر وزیر اعظم سے اہم ملاقات کر رہے ہیں۔

قومی احتساب بیورو (نیب) رولز پر پیش رفت سے متعلق عدالتی استفسارپر پراسیکیوٹر نے بتایا مسودہ وزارت قانون کو بھجوا رکھا ہے، معاملہ زیر التوا ہے۔

سپریم کورٹ نے نیب کی غیر جانبداری پر بھی سوال اٹھا دیے

جسٹس مقبول باقر نے تفصیلی فیصلے میں لکھا ہے کہ نیب کی بدنامی اور اس سے حقارت کی شہرت اب پاکستانی سرحدیں بھی عبورکرچکی ہیں

چیف جسٹس نے برہمی کا اظہار کرتے ہوئے کہا کہ وزارت قانون میں مستقل سیکرٹری تعینات کیوں نہیں کیا جا رہا؟ ایڈہاک ازم کا سلسلہ بند ہونا چاہیے، مستقل سیکرٹری قانون جلد تعینات کیا جائے۔

سپریم کورٹ نے حکومت کو 120 نئی احتساب عدالتوں کے قیام کا فیصلہ ایک ماہ میں کرنے کا حکم  دیتے ہوئے تمام احتساب عدالتوں کو روزانہ کی بنیاد پرکرپشن مقدمات کی سماعت کرنے اور کسی مقدمے میں غیر ضروری التواء نہ دینے کی ہدایت بھی کر دی۔

 عدالت نے حکم دیا ہے کہ نیب استغاثہ تمام گواہان کی موجودگی کو یقینی بنائیں، چیئرمین نیب مقدمات کے ٹرائل میں تاخیر کے ذمہ دار افسروں اور اہلکاروں کے خلاف محکمانہ کارروائی کریں، کیس کی مزید سماعت ایک ماہ کے لیے ملتوی کر دی گئی۔