21 دسمبر ، 2020 
’سینیٹ کی خالی ہونے والی نشستوں پر انتخابات کا انعقاد 10 فروری سے قبل نہیں ہوسکتا‘
21 دسمبر ، 2020
اسلام آباد: الیکشن کمیشن کا کہنا ہےکہ آئین کے مطابق مدت پوری کرکے خالی ہونے والی سینیٹ کی نشستوں پر انتخابات 30 دن قبل نہیں ہوسکتا۔
الیکشن کمیشن کی جانب سے جاری اعلامیے میں کہا گیا ہےکہ سینیٹ کے نصف ارکان 11 مارچ کو ریٹائرڈ ہوجائیں گے اور آئین کے مطابق جو نشستیں اپنی مدت معیاد پوری کرنے کے بعد خالی ہوں ان پر الیکشن کا انعقاد 30 دن قبل نہیں ہوسکتا، اس طرح سینیٹ کی خالی ہونے والی ان نشستوں پر انتخابات کا انعقاد 10 فروری 2021 سے قبل نہیں ہوسکتا۔
اعلامیے میں کہا گیا ہےکہ عام طور پر سینیٹ کے گزشتہ 4 سے 5 انتخابات مارچ کے پہلے ہفتے میں منعقد ہوتے رہے ہیں اس بار بھی الیکشن کمیشن آئین اور قانون کے مطابق مناسب وقت پر ان انتخابات کی تاریخ کا اعلان ایک انتخابی پروگرام کی صورت میں جاری کرے گا۔
الیکشن کمیشن کا کہنا ہےکہ سینیٹ الیکشن کا انعقاد الیکشن کمیشن کی آئینی اور قانونی ذمہ داری ہے اور الیکشن کمیشن اپنی ذمہ داریوں سے بخوبی آگاہ ہے، کمیشن آئین اور قانون کی روشنی میں اپنی ذمہ داریاں نبھانے کے لیے پرعزم ہے۔
اس موقع پر الیکشن کمیشن نے ضمنی الیکشن کا بھی اعلان کیا ہے جس کے مطابق بلوچستان اور سندھ کی نشستوں پر انتخاب 16 فروری جب کہ قومی اسمبلی، پنجاب اور خیبرپختونخوا کی اسمبلیوں پر انتخاب 19 فروری کو ہوگا۔
واضح رہےکہ حکومت سینیٹ کا الیکشن مارچ کے بجائے فروری میں کرانے کا فیصلہ کرچکی ہے اور اس حوالے سے وزیراعظم عمران خان نے میڈیا سے گفتگو میں اعلان بھی کیا جب کہ اپوزیشن نے حکومتی فیصلے کو مسترد کرتے ہوئے اس کے خلاف شدید مزاحمت کا اعلان کیا ہے۔
