لندن …یورپین فٹ بال چیمپئنز لیگ 2012-13ء میں مانچسٹر یونائیٹڈ، بارسلونا اور بائرن میونخ نے اپنے اپنے میچز جیت لئے، دفاعی چیمپئن چیلسی اور جیونٹس کی ٹیموں کے درمیان میچ برابر رہا۔ یوئیفا چیمپئنز لیگ کے آغاز کے ساتھ ہی مختلف ٹیموں کے درمیان سنسنی اور دلچسپ مقابلوں کا سلسلہ شروع ہو چکا ہے۔ ایونٹ میں گزشتہ روز کھیلے گئے میچ میں مانچسٹر یونائیٹڈ کی ٹیم نے انتہائی شاندار کارکردگی کا مظاہرہ کرتے ہوئے گلاٹاسیری کو سخت مقابلے کے بعد 1-0 گول سے شکست دی۔ ایک اور میچ میں بارسلونا کی ٹیم نے عمدہ کارکردگی کی بدولت سپارٹک ماسکو کو دو کے مقابلے میں تین گول سے ہرا کر ایونٹ کا فاتحانہ آغاز کیا۔ بائرن میونخ کی ٹیم نے شاندار کھیل پیش کرتے ہوئے ویلنسیا کو ایک کے مقابلے میں دو گول سے ہرایا۔ دفاعی چیمپئن چیلسی اور جیونٹس کے درمیان زبردست مقابلہ دیکھنے کو ملا، دونوں ٹیموں نے فیصلہ کن گول سکور کیلئے آخر دم تک سرتوڑ کوشش کی لیکن کوئی بھی ٹیم کامیاب نہ ہو سکی اور میچ 2-2 گول سے برابری پر ختم ہوا۔