31 دسمبر ، 2021 
سندھ میں ایک ہزار سے زائد اسکولوں کی صرف کاغذوں میں موجودگی کا انکشاف
31 دسمبر ، 2021
سندھ میں گھوسٹ اساتذہ کے بعد گھوسٹ اسکولوں کا بھی انکشاف ہوا ہے۔
جیونیوز کےمطابق سندھ میں ایک ہزار 459 اسکولوں کا صرف کاغذوں میں موجودگی کا انکشاف ہوا ہے جس کے بعد محکمہ تعلیم نے ان اسکولوں کو اپنی لسٹ سے خارج کردیا۔
صوبے میں کاغذوں میں موجود 1400 سے زائد یہ اسکولز کراچی، بدین، دادو، گھوٹکی، جیکب آباد، قمبر، میرپور خاص، جامشورو اور سانگھڑ کے سرکاری کاغذوں میں موجود تھے جب کہ ان اسکولوں میں طلبہ، اساتذہ اور اسٹاف رجسٹرڈ نہیں۔
غیر حقیقی شدہ ان اسکولوں میں سے کراچی میں 62 اور حیدرآباد میں 2 اسکول شامل تھے۔
صوبے میں 1400 اسکولز کئی سالوں سے بند
اس کے علاوہ صوبے کے تقریباً 1400 اسکولز کئی سالوں سے مکمل طور پر بند ہیں جب کہ خراب حالت اور فنکشنل نہ ہونے کی وجہ سے سندھ کے تقریباً ساڑھے تین ہزار اسکولوں کو بند کردیا گیا جس کا نوٹیفکیشن بھی جاری کردیا گیا ہے۔
ذرائع محکمہ تعلیم کا کہنا ہےکہ کئی سالوں تک صرف کاغذوں میں موجود ان اسکولوں کے لیے بجٹ جاری ہوتا رہا۔
محکمہ تعلیم نے ان اسکولوں میں تعینات اساتذہ کے خلاف کاروائی کرنے کا بھی فیصلہ کیا ہے جس کے تحت گھربیٹھے تنخواہ لینے والے اساتذہ کے خلاف محکمہ جاتی کارروائی ہوگی اور اس صورتحال کے ذمہ داروں کو شوکاز بھی جاری کیے جائیں گے۔
