اسحاق ڈار کی لندن سے سینیٹ رکنیت کا حلف لینےکی درخواست مسترد کردی گئی

چیئرمین سینیٹ نے  مسلم لیگ ن کے رہنما اسحاق ڈار کی بطور  رکن سینیٹ،  ورچوئل حلف لینے یا لندن میں ہائی کمیشن میں حلف لینے سے متعلق درخواست مسترد کردی۔

چیئرمین سینیٹ صادق سنجرانی نے سینیٹ رکنیت کا حلف لینے سے متعلق اسحاق ڈار کے خط کا جواب دے دیا ہے، چیئرمین سینیٹ نے خط کی کاپی اسحاق ڈار کو ارسال کر دی ہے، جوابی خط میں سینیٹ قواعد و ضوابط کاحوالہ دیا گیا ہے۔

اسحاق ڈار نے سینیٹ نشست کا حلف اٹھانے کیلئے خط لکھ دیا

قانونی رکاوٹیں دور ہونے کے بعد بطور منتخب سینیٹر حلف اٹھانے کے لیے تیار ہوں، بطور سینیٹر ویڈیو لنک کے ذریعے حلف لیا جائے: خط کا متن

چیئرمین سینیٹ نے خط میں کہا ہے کہ آپ نےکہا کہ نشست کے لیے ورچوئل (بذریعہ ویڈیو لنک) حلف لیا جائے یا پھر پاکستانی ہائی کمیشن لندن میں ایڈمنسٹریٹر کے ذریعے حلف لینے کے انتظامات کیے جائیں۔

چیئرمین سینیٹ کا کہنا تھا کہ سینیٹ کے اپنے رولز ہیں، آئین اور سینیٹ رولز کے مطابق منتخب رکن نے سینیٹ میں حلف اٹھانا ہے نہ کہ ورچوئل یا ہائی کمیشن میں، لہٰذا  آپ کی درخواست مسترد کی جاتی ہے۔