28 اپریل ، 2022 
راجہ پرویز اشرف نے سابق اسپیکر کی غیر قانونی بھرتیوں کا نوٹس لے لیا
28 اپریل ، 2022
اسپیکر قومی اسمبلی راجہ پرویز اشرف نے سابق اسپیکر اسد قیصر کی غیر قانونی بھرتیوں کا نوٹس لے لیا۔
ذرائع کے مطابق راجہ پرویز اشرف نے سابق دور میں قومی اسمبلی سیکرٹریٹ میں ہونے والی بھرتیوں کی رپورٹ مانگ لی ہے۔
ذرائع کا کہنا ہے کہ اسپیکر قومی اسمبلی نے تفصیلات طلب کر لی ہیں کہ کس کس شعبے میں لوگوں کو بھرتی کیا گیا اور ڈیپوٹیشن پر کون آیا؟
ذرائع کا بتانا ہے کہ راجہ پرویز اشرف نے یہ تفصیلات بھی طلب کر لی ہیں کہ غیر قانونی طور پر کس کی ترقی ہوئی؟
ذرائع کے مطابق اسپیکر قومی اسمبلی راجہ پرویز اشرف انکوائری کے بعد غیر قانونی طور پر بھرتی ہونے والوں کے خلاف کارروائی کریں گے۔
ذرائع کا کہنا ہے کہ اسپیکر قومی اسمبلی راجہ پرویز اشرف نے معاملے پر جامع تحقیقات کا بھی حکم دے دیا ہے۔
یاد رہے کہ چند روز قبل یہ خبر سامنے آئی تھی کہ سابق اسپیکر قومی اسمبلی اسد قیصر نے اپنے اختیارات کا ناجائز استعمال کرتے ہوئے ایک 72 سالہ شخص کو 19 لاکھ روپے ماہانہ تنخواہ پر بھرتی کیا۔
