کراچی … کراچی میں بلوچ کالونی سے کورنگی جانے والی باراتیوں سے بھری بس بیرئیر سے ٹکرا گئی، جس کے نتیجے میں تین خواتین اور دو بچوں سمیت سات افراد جاں بحق اور آٹھ افراد زخمی ہو گئے۔پولیس کے مطابق بلوچ کالونی سے کورنگی جانے والی سڑک پر باراتیوں سے بھری ایک بس ہیوی ٹریفک کو داخل ہونے سے روکنے کے لئے قائم اوور ہیڈ بیرئیر سے ٹکرا گئی۔ٹکر کے نتیجے میں بیرئیر کا ایک حصہ باراتیوں کی بس پرگر گیا اوربس درمیان سے مکمل طور پر پچک گئی۔پولیس کے مطابق بس کو حادثہ تیز رفتاری کے باعث ڈرائیور کے غلط موڑ کاٹنے کی وجہ سے پیش آیا ہے۔ واقعے کی اطلاع ملتے ہی ریسکو اداروں کی گاڑیاں جائے حادثے پر پہنچ گئی اور زخمیوں کو گاڑی سے نکالنا شروع کردیا۔ رکن سندھ اسمبلی عامر معین پیرزادہ نے جائے حادثہ پر جیو نیوز سے گفتگو کرتے ہوئے بتایا کہ حادثے کے نتیجے میں جاں بحق اورزخمی ہونے والوں کوجناح اسپتال منتقل کیا گیا ہے۔ عینی شاہدین کا کہنا ہے کہ بس ڈرائیوراندھیرے کے باعث اوور ہیڈ بیرئیر کو دیکھ نہیں سکا اور حادثہ پیش آگیا۔ پولیس نے واقعے کے ذمے دار ڈرائیور کو گرفتار کرلیا ہے ۔