کھیل

کیوی آل راؤنڈر جمی نیشم نے سینٹرل کنٹریکٹ کی پیشکش ٹھکرا دی

16 ستمبر ، 2022

جانتا ہوں کہ سینٹرل کنٹریکٹ کے انکار کے فیصلے کے بعد کہا جائے گا کہ میں نے پیسے کو ترجیح دی: جمی نیشم۔ فوٹو: فائل

نیوزی لینڈ کے اسٹار آل راؤنڈر جمی نیشم نے سینٹرل کنٹریکٹ کی پیشکش ٹھکرا دی۔

نیوزی لینڈ کرکٹ کے مطابق جمی نیشم کو ایک دستیاب کنٹریکٹ کی پیشکش کی گئی لیکن انہوں نے انکار کر دیا، وہ پہلے سے طے شدہ اوورسیز ڈومیسٹک لیگز کے ساتھ معاہدوں کی وجہ سے مصروف ہیں۔

کرکٹ نیوزی لینڈ کا کہنا ہے کہ دو سرے نان کنٹریکٹڈ کرکٹرز کی طرح جمی نشیم جب بھی دستیاب ہوئے، انہیں سلیکشن کے لیے زیرغور لایا جائے گا۔

یہ بھی پڑھیں

ٹرینٹ بولٹ اور کولن ڈی گرینڈہوم کے جانے کے بعد کنٹریکٹ میں دو کھلاڑیوں کی گنجائش تھی، بلیئر ٹکنر اور فن ایلن کو اب سینٹرل کنٹریکٹ کی فہرست میں شامل کر لیا گیا ہے۔

اس حوالے سے جمی نیشم نے ٹوئٹر پر جاری بیان میں کہا میں جانتا ہوں کہ سینٹرل کنٹریکٹ کے انکار کے فیصلے کے بعد کہا جائے گا کہ میں نے پیسے کو ترجیح دی لیکن جولائی میں میرا ارادہ تھا کہ میں سینٹرل کنٹریکٹ کی پیشکش قبول کر لوں۔

انہوں نے کہا جب مجھے فہرست میں شامل نہ کیا گیا تو میں نے دنیا میں دیگر لیگز سے معاہدے کر لیے، یہ ایک مشکل فیصلہ تھا لیکن میں نے اپنی کمٹمنٹس پوری کرنے کے لیے کنٹریکٹ لینے سے انکار کیا۔

آل راؤنڈر نے کہا میں نے اپنی کمٹمنٹ سے پھر کر واپس نیوزی لینڈ کرکٹ سے معاہدہ نہیں کیا، نیوزی لینڈ کے لیے کھیلنا میرے ہمیشہ اعزاز رہا ہے، مستقبل میں بھی ملک کے لیے کھیلنے کا منتظر رہوں گا۔