پاکستانی ٹیم میں چوتھے نمبر پر کس کو کھلانا چاہیے؟ کولن منرو نے بتادیا

نیوزی لینڈ کے جارح مزاج بیٹر اور پاکستان جونیئر لیگ میں راولپنڈی رائیڈرز کے مینٹور کولن منرو نے پاکستانی ٹیم کے مڈل آرڈر سے متعلق خیالات کا اظہار کیا ہے۔

 جیو نیو ز سے خصوصی گفتگو کرتے ہو ئے کولن منرو نے کہا  کہ آئی سی سی ٹی ٹوئنٹی ورلڈ کپ میں پاکستان کرکٹ ٹیم کا بولنگ اٹیک بہت شاندار ہے۔

مڈل آرڈر سے متعلق انہوں نے کہا کہ آل راؤنڈر شاداب خان کو چوتھے نمبر پر بیٹنگ کرنی چاہیے، انہوں نے پی ایس ایل میں کر کے دکھایا ہے۔

منرو نے مزید کہا کہ شاداب خان  بیٹنگ میں مہارت ثابت کر چکے ہیں ، انہیں اور کیا کرنے کی ضرورت ہے؟ بابر اعظم کے ٹاپ آرڈر پر کھیلنے پر باتیں ہو رہی ہیں لیکن وہ اس پوزیشن پر اچھا کھیل رہے ہیں۔

کیوی کرکٹر نے کہا کہ آصف علی سے ابھی شاٹس نہیں لگ رہیں، انہیں ٹائم دیں ہر بیٹر کو ٹائم چاہیے ہوتا ہے، میں کچھ تبدیلیاں ضرور کروں لیکن میں ایسا نہیں کر سکتا کیونکہ میں صوفے پر بیٹھ کر میچ دیکھ رہا ہوتا ہوں۔

جارح مزاج بیٹر نے اپنی ٹیم سے متعلق کہا  کہ نیوزی لینڈ کے کرکٹرز کو ورلڈ کپ میں کچھ کر کے دکھانا ہو گا ، بعض کرکٹرز  برے وقت سے گزر رہے ہیں لیکن وہ ورلڈ کلاس کرکٹرز ہیں، کیویز کو مقابلے سے باہر نہیں رکھاجا سکتا۔

 انہوں نے کہا کہ ابھی مارٹن گپٹل کو سہ ملکی سیریز کے تمام میچز نہ کھلانے کا افسوس ہے، نیوزی لینڈ ٹیم کو اپنا توازن بہتر کرنا ہے جب کہ پاکستان ٹیم اچھی لگ رہی ہے۔

راولپنڈی ریڈرز کے مینٹور کولن منرو نے کہا کہ پی جے ایل کے لیے آنا اچھا لگ رہا ہے، ٹیلنٹ کو دیکھنے کا موقع مل رہا ہےسب مینٹورز اور کھلاڑی ایک ہی جگہ رہتے ہیں، ایک دوسرے سے سیکھنے کا موقع مل رہا ہے، پاکستان کو ہمیشہ اچھا ٹیلنٹ ملا ہے۔

انہوں نے مزید کہا کہ فاسٹ بولرز حسنین اور نسیم شاہ اس کی مثال ہیں، نسیم شاہ کو تو ابھی پی جے ایل میں ہونا چاہیے، وہ تو انیس بیس سال کے ہیں۔

منرو کا کہنا تھا کہ پی جے ایل کے کھلاڑی پی ایس ایل کے ایمرجنگ پلیئرز ثابت ہوں گے، یہ کرکٹرز اپنا ٹیلنٹ دکھا کر آگے بڑھیں گے ، پی ایس ایل کے گزشتہ سیزن سے حارث سامنے آئے، پی جے ایل کے کرکٹرز کو اسی اسٹیڈیم میں کھیلنے کا موقع مل رہاہے جہاں پی ایس ایل کے میچز ہوتے ہیں۔