جہازوں سے پرندے ٹکرانے کے واقعات روکنے کیلئے روبوٹ فالکن تیار

پرندوں کے جہازوں سے ٹکرانے کے واقعات میں اضافہ ہورہا ہے جس سے پرواز  کو خطرات لاحق ہوتے ہیں اور بعض اوقات ہنگامی لینڈنگ کی ضرورت بھی پیش آتی ہے لیکن اب ان واقعات پر قابو پانے کے لیے ٹیکنالوجی کا سہارا لیا جارہا ہے۔

میڈیا رپورٹس کے مطابق نیدر لینڈز نے پرندوں کے جہازوں سے ٹکرانے کے واقعات کی روک تھام کے لیے ایک حل نکالا ہے جس میں ایک روبوٹ فالکن کی مدد لی گئی ہے۔

ائیرپورٹ وائلڈ لائف مینجمنٹ ٹیم کی جانب سے روبوٹ فالکن کی مدد سے ائیر پورٹ کے احاطے سے پرندوں کو ڈرا کر بھگایا جارہا ہے۔

یہ روبوٹ فائبر سے بنایا گیا ہے جس کے پر 70 سینٹی میٹر کے ہیں اور یہ ایک زور دار آواز نکالتا ہے، اس کے علاوہ فالکن کے پروں میں کیمرے بھی نصب کیے گئے ہیں جب کہ اس کا مجموعی وزن ایک کلو سے کم ہے۔

اس سے قبل سال 2019 میں بھی نیدر لینڈز کے شہر ورکم میں اس منصوبے کا کامیاب تجربہ کیا گیا جس میں روبوٹ فالکن نے اپنی 5 منٹ کی اڑان میں 70 سیکنڈز میں 50 فیصد حصے سے پرندوں کے جھنڈ کو بھگایا تھا۔

ایک رپورٹ کے مطابق اس تجربے میں روبوٹ فالکن ڈرون کے مقابلے میں زیادہ کارآمد ثابت ہوا ہے۔