28 اکتوبر ، 2022 
منگھوپیر کی پوش آبادی کیلئے غیرقانونی واٹر سپلائی کنکشن لیتے ہوئے 3 ملزمان گرفتار
28 اکتوبر ، 2022
منگھوپیر کی پوش رہائشی آبادی کے لیے واٹر بورڈ کی مرکزی لائن سے غیر قانونی کنکشن لیتے ہوئے تین ملزمان کو پولیس نے گرفتار کر لیا۔
سینئر سپرینٹنڈنٹ پولیس کراچی ویسٹ فیصل بشیر میمن کے مطابق خفیہ اطلاع ملنے پر منگھوپیر پولیس نے منگھوپیر روڈ پر نیا ناظم آباد کے قریب کارروائی کی جہاں کشمیر خان نامی ٹھیکدار نے تین انچ کی غیر قانونی لائن ڈالی تھی۔
پولیس کے مطابق ملزمان اور اس کے ساتھی منگھوپیر روڈ پر واٹر بورڈ کی 66 انچ قطر کی مرکزی لائن سے غیر قانونی کنکشن لے رہے تھے۔
فیصل بشیر میمن کے مطابق اطلاع ملتے ہی پولیس نے فوری کارروائی کی، ملزمان نے واٹر بورڈ کی 66 انچ کی مرکزی واٹر سپلائی لائن کو نقصان پہنچایا، ملزم شریف کشمیری، گل محمد اور مسافر خان کو گرفتار کر لیا گیا۔
ایس ایس پی ویسٹ کے مطابق ملزمان کے خلاف منگھوپیر تھانے میں ایف آئی آر نمبر 103/2022 اے ایس آئی محمد ارشد کی مدعیت میں درج کرلی گئی۔
پولیس ذرائع کے مطابق واٹربورڈ کے اینٹی واٹر پمپ سیل نے چند روز قبل ہی پوش آبادی کے کنکشن منقطع کیے تھے، ٹھیکیدار واٹر بورڈ کے مقامی اہلکاروں کی مدد سے غیر قانونی لائن ڈال رہا تھا کہ پولیس نے خفیہ اطلاع ملنے پر کارروائی کی۔
