سندھ پولیس کی آئیڈیاز میں پہلی بار شرکت

کراچی: سندھ پولیس کی جانب سے سکیورٹی اینڈ ایمرجنسی سروسز ڈویژن ایکسپو سینٹر میں 15 سے 18 نومبر تک بین الاقوامی دفاعی نمائش اور سیمینار آئیڈیاز کے 11ویں ایڈیشن میں شرکت کررہا ہے جو  بین الاقوامی نمائشی تقریب میں سندھ پولیس کی پہلی شرکت ہے۔

اس تقریب میں پاکستان کی مسلح افواج، قومی اور بین الاقوامی دفاعی صنعتوں، OEMs، کاروباری افراد اور اعلیٰ سطح کے قومی اور بین الاقوامی دفاعی وفود کی ایک بڑی تعداد شرکت کر رہی ہے، جدید طرز پر آئیڈیاز کے انعقاد کا مقصد دفاعی خریداروں اور فروخت کنندگان کو ایک مؤثر پلیٹ فارم فراہم کرنا ہے۔

سندھ پولیس ہال نمبر 8 (مارکیو) پاکستان پویلین میں اپنی خدمات کی نمائش کا مظاہرہ کر رہی ہے جس میں محکمہ جدید پولیسنگ اور جدید ترین انفارمیشن ٹیکنالوجی کونظام میں شامل کرنے کی جانب اپنے سفر کی عکاسی کر رہا ہے۔

یہ جدید ترین ہتھیاروں اور کمیونیکیشن سسٹم سے لیس پیشہ ورانہ اور تربیت یافتہ اسپیشل سییورٹی یونٹ کے کمانڈوز پر مشتمل اسپیشل ویپن اینڈ ٹیکٹکس ٹیم (S.W.A.T) کی خدمات و خصوصیات کو بھی اجا گر کر رہا ہے، مہمانوں کو سندھ پولیس کی جانب سے مجرموں کو پکڑنے کے لیے حال ہی میں لانچ کی گئی ’تلاش‘ ایپ کے بارے میں بھی بریفنگ دی جا رہی ہے۔

اس موقع پر ڈی آئی جی سکیورٹی اینڈ ایمرجنسی سروسز ڈویژن ڈاکٹر مقصود احمد نے کہا کہ ماضی قریب میں سندھ پولیس خاص طور پر سکیورٹی اینڈ ایمرجنسی سروسز ڈویژن نے اپنی خدمات کے دائرہ کو وسیع کیا ہے اور جدید تکنیکس اور ٹیکنالوجی کو اپنایا ہے جس کو مد نظر رکھتے ہوئے سندھ پولیس کی قیادت نے نمائش میں اپنی خدمات کی خصوصیات کو پیش کرنے کا فیصلہ کیا ہے جس سے بین الاقوامی سطح پر پاکستانی پولیس کے مثبت تشخص اجاگر کرنے میں مدد ملے گی۔