18 نومبر ، 2022 
کراچی میں ڈمپر نے اسکول جاتے بھائیوں کو کچل ڈالا، ایک جاں بحق، 2 شدید زخمی
18 نومبر ، 2022
کراچی کے علاقے سرجانی ٹاؤن میں تیز رفتار ڈمپر کی ٹکر سے ایک طالب علم جاں بحق جب کہ متوفی کے دو بھائی شدید زخمی ہوگئے۔
پولیس ذرائع کے مطابق حادثہ سرجانی ٹاؤن میں بابا موڑ کے قریب پیش آیا، تینوں بھائی گھر سے موٹر سائیکل پر اسکول جارہے تھے کہ تیز رفتار ڈمپر نے کچل دیا جس سے تینوں طالب علم شدید زخمی ہوئے۔
ذرائع کے مطابق تینوں بچوں کو فوری طور پر عباسی شہید اسپتال پہنچایا گیا جہاں پہنچنے پر ڈاکٹروں نے ایک کی موت کی تصدیق کر دی جبکہ دو کو اسپتال میں طبی امداد دی جا رہی ہے۔
زخمی بھائیوں کے نام 15 سالہ اظہر اصغر اور 12 سالہ عثمان اصغر بتائے گئے ہیں جبکہ 12 سالہ عمر اصغر حادثے میں جاں بحق ہوا۔
پولیس کے مطابق حادثے کا ذمہ دار ڈرائیور موقع سے فرار ہو گیا جبکہ ڈمپر کو قبضے میں لے لیا گیا ہے اور ڈرائیور کی تلاش شروع کر دی گئی ہے۔
