26 نومبر ، 2022 
کراچی سے چھینی گئی قیمتی گاڑی 4 گھنٹے بعد دادو کے کچے علاقے سے برآمد
26 نومبر ، 2022
سندھ پولیس کے اینٹی وہیکل لفٹنگ سیل (اے وی ایل سی) کے عملے نے کراچی کے علاقے گلستان جوہر سے چھینی گئی قیمتی گاڑی 4 گھنٹے بعد دادو کے کچے کے علاقے سے برآمد کرلی۔
اے وی ایل سی ، سی آئی اے کے سینیئر سپرنٹنڈنٹ آف پولیس محمد انور کتھران کے مطابق کراچی کے علاقے گلستان جوہر سے ہفتہ کی صبح 6:40 بجے تین ملزمان نے ٹیوٹا کرولا ریوو گاڑی نمبر ایل 4446 اسلحہ کے زور پر چھینی اور فرار ہوگئے۔
انور کھتران کے مطابق واردات کی اطلاع ملتے ہی اے وی ایل سی کی جانب سے فوری طور پر کراچی کے مختلف علاقوں کی پولیس کے علاوہ موٹر وے پولیس، حیدرآباد، سیہون اور دادو کے علاقوں میں بھی پولیس کو آگاہ کر کے گاڑی کی ہرممکن تلاش کا حکم دیا گیا۔
ایس ایس پی کے مطابق واردات کے چار گھنٹے بعد اے وی ایل سی کے عملے نے دادو پولیس کی مدد سے گاڑی کا سراغ لگایا جو دادو کے کچے کے علاقے میں موجود پائی گئی۔
پولیس ذرائع کے مطابق اس سلسلے میں کوئی گرفتاری عمل میں نہیں آئی تاہم اس سلسلے میں پولیس کی کوششیں جاری ہیں۔
