28 دسمبر ، 2022 
کراچی: حسین آباد میں فائرنگ سے سیاسی جماعت کا کارکن جاں بحق
28 دسمبر ، 2022
کراچی وسطی کے علاقے فیڈرل بی ایریا حسین آباد میں فائرنگ کے ایک واقعے میں ایک شخص جاں بحق ہوگیا، پولیس کی ابتدائی تفتیش کے مطابق واقعہ ٹارگٹ کلنگ معلوم ہوتا ہے۔
واقعہ فیڈرل بی ایریا کے علاقے حسین آباد بلاک 3 میں پیش آیا۔ جاں بحق شخص کے حوالے سے بتایا جاتا ہے کہ اس کا تعلق ایک سیاسی جماعت کے لندن گروپ سے تھا اور اس کی شناخت 50 سالہ شہزاد عرف سونی کے نام سے ہوئی ہے۔
پولیس کے مطابق فائرنگ کے اس واقعے میں فہیم عرف باجرا نامی شہری زخمی بھی ہوا ہے جسے طبی امداد کیلئے اسپتال منتقل کر دیا گیا ہے۔
سینیئر سپرنٹنڈنٹ آف پولیس سینٹرل معروف عثمان کے مطابق مقتول حسین آباد میں اپنے دوست کی دکان پر آیا کرتا تھا، حسب معمول وہ بدھ کی شام دکان پر بیٹھا تھا کہ پیدل آئے دو ملزمان نے نشانہ بنایا۔ پولیس کے مطابق ملزمان نے فرار ہوتے وقت ہوائی فائرنگ بھی کی۔
