نظر یہی آرہا ہے بابر اعظم کو کمزور کیا جا رہا ہے جو نہیں ہونا چاہیے : مصباح

لاہور : پاکستان کرکٹ ٹیم کے سابق کپتان و ہیڈ کوچ مصباح الحق کا کہنا ہے کہ نظر یہی آرہا ہے کہ بابر اعظم کو کمزور کیا جا رہا ہے جو نہیں ہونا چاہیے۔

قلندرز ہائی پرفارمنس سینٹر میں میڈیا سے گفتگو کرتے ہوئے مصباح الحق نے کہا کہ جس طرح کی پریس کانفرنسز اور  ان پریس کانفرنسز میں سوالات ہو رہے ہیں وہ سب دیکھ رہے ہیں، اگر کوئی فیصلہ کرنا ہے تو سب مل بیٹھ کر کر لیں، کھلاڑی ، سلیکشن کمیٹی اور بورڈ بیٹھیں اور آرام سے فیصلہ کر لیں۔

نائب کپتان شان مسعود ون ڈے سیریز کھیلیں گے یا نہیں کچھ نہیں کہہ سکتا: بابراعظم

ون ڈے سیریز میں نائب کپتان شان مسعودکی پلیئنگ الیون میں شمولیت سے متعلق کچھ نہیں کہہ سکتا

مصباح الحق نے مزید کہا کہ صورتحال کا جائزہ لیں، اگر آپ کو لگتا ہے کہ تبدیلیاں ہونی ہیں تو کر لیں، کسی اور وجہ سے آپ کسی پر  پریشر ڈال دیں، پوری ٹیم ڈسٹرب ہو  یہ نہیں ہونا چاہیے،  پاکستان کرکٹ کی بہتری کیلئے مل کر فیصلے کریں۔

سابق کپتان نے کہا کہ  کرکٹ میرے خون میں ہے ، اس لیے کھیل سے آگاہ رہتا ہوں، جہاں بھی ہوں کرکٹ دیکھتا رہتا ہوں، کیا ہو رہا ہے یہ سب پتہ ہے، حال ہی میں تجربات کرنے سے پاکستان کرکٹ ٹیم کو نقصان ہوا ہے، انگلینڈ اور نیوزی لینڈ کے خلاف ہوم سیریز میں جو پرفارمنس رہی ہے وہ سب کے سامنے ہے، ٹیسٹ کی ٹیم بہت مشکل سے بنتی ہے ، آپ نے اس میں تبدیلیاں کر دیں، ٹیسٹ ٹیم کی ڈویلپمنٹ آسان نہیں، پاکستان کو تو ٹیسٹ میچز بھی کم ملتے ہیں۔

آپکو نہیں لگتا کہ آپ کو ٹیسٹ کپتانی چھوڑدینی چاہیے! صحافی کے سوال پر بابر نے کیا کہا؟

بابر اعظم نے صحافی کے سوال کو تحمل سے سنا اور پھر کپتانی چھوڑدینے کا سوال نظر انداز کرتے ہوئے آگے بڑھ گئے

انہوں نے کہا کہ چار چار تبدیلیاں کریں تو اس سے بیٹنگ اور بولنگ یکسر تبدیل ہو جائے گی، ٹیسٹ میں ہم آف ٹریک ہو ئے ہیں، تبدیلیوں سے نتائج حاصل نہیں ہو سکتے،  وائٹ بال کرکٹ میں پاکستان ٹیم بلاشبہ ایک طاقت کا نام ہے، وائٹ بال کرکٹ میں پاکستان کے بولرز اور بیٹرز ٹاپ کے ہیں۔

مصباح نے کہا کہ الگ الگ کپتان بنانے سے آپ بہت زیادہ چیزوں کو  ہلا جلا دیں گے، ہمارے ہاں الگ الگ کپتان کرنے سے مقابلے بازی شروع ہو جاتی ہے، الگ الگ کپتان کرنے سے ایک سیاسی ماحول بن جاتا ہے، چیزیں آسان نہیں رہتیں۔