24 فروری ، 2023 
ویڈیو: ترکیہ زلزلے میں کام کرنیوالی پاکستانی ریسکیو ٹیم کو استنبول میں شاندار خراج تحسین
24 فروری ، 2023
ترکیہ میں زلزلے کے دوران ریسکیو کارروائیوں میں حصہ لینے والی پاکستانی ٹیم کو زبردست خراج تحسین پیش کیا گیا۔
ترکیہ میں آنے والے شدید زلزلے کے باعث پاک فوج کی اربن سرچ اور ریسکیو ٹیم مدد کیلئے پہنچی جس نے ملبے تلے دبے افراد کو نکالنے کیلئے ناصرف اپنی خدمات پیش کیں بلکہ صلاحیت کا بھی بھرپور مظاہرہ کیا۔
ترکیہ حکومت کے اعلان کے ساتھ ہی ریسکیو آپریشن ختم کردیا گیا جس کے بعد ریسکیو ٹیم اپنا مشن مکمل کرکے وطن واپسی کیلئے استنبول پہنچی تو ان کا والہانہ استقبال کیا گیا۔
اس حوالے سے سوشل میڈیا پر وائرل ویڈیو میں ریسکیو اہلکاروں کو دیکھا جاسکتا ہے جن کے آنے پر استنبول کے ائیرپورٹ پر موجود افراد نے تالیاں بجاکر ان کا استقبال کیا اور ان کی خدمات کو سراہا۔
دوسری جانب ریسکیو ٹیم کے وطن پہنچنے پر پاکستان میں ترکیہ کے سفیر نے ٹیم کا استقبال کیا۔
انہوں نے کہا کہ امدادی ٹیموں کی جانب سے مشکل کی گھڑی میں ترکیہ کا بھرپور ساتھ دینے پر مشکور ہیں، پاک فوج کی ریسکیو ٹیموں نے ترکیہ میں 91 سائٹس کو سرچ کیا اور 39 مقامات پر ریسکیو آپریشن کیا گیا۔
ریسکیو ٹیم نے ترکیہ میں 8 افراد کو زندہ بچا لیا جن میں بچے بھی شامل تھے جب کہ ملبے تلے دب کر جاں بحق ہونے والے 138 افراد کو نکالا گیا۔
