17 مارچ ، 2023 
گلستان جوہر سے اغوا نوجوان 3 ماہ بعد کشمور کے کچے کے علاقے سے بازیاب
17 مارچ ، 2023
اینٹی وائلنٹ کرائم سیل کے عملے نے کراچی کے علاقے گلستان جوہر سے 3 ماہ قبل اغوا کیے گئے نوجوان کو کشمور کے کچے کے علاقے میں آپریشن کے دوران بازیاب کرا لیا۔
سینئر سپریٹینڈنٹ پولیس اے وی سی سی عبدالرحیم شیرازی کے مطابق کشمور کچے کے علاقے میں آپریشن کے دوران اسپیشلائز ٹیم نے لوکل پولیس کے ہمراہ کارروائی کی اور مغوی نوجوان کو بازیاب کروالیا۔
عبدالرحیم شیرازی کے مطابق مغوی ذاکر اللہ کو گلستان جوہر سے 15 دسمبر کو اغواکیا گیا تھا، غوث پور کرم پور بیگھاری اور کشمور سے تاوان کے لیے فون کالز کی گئیں۔
عبدالرحیم شیرازی نے بتایا کہ اے وی سی سی نے کچے کے مختلف علاقوں میں کارروائیاں کیں، مغوی کو غوث پور میں آپریشن کرتے ہوئے بازیاب کرایا گیا۔
اغوا کاروں نے مغوی کو کچے کے علاقے میں چھپا رکھا تھا اور ذاکر اللہ کو بھاری تاوان کے لیے اغوا کیا گیا تھا،کارروائی کے دوران ملزمان فرار ہونے میں کامیاب ہوگئےتاہم مغوی کو بحفاظت کراچی منتقل کر دیا گیا۔
