01 اپریل ، 2023 
مفتی عبدالقیوم کے قتل میں ملوث پولیس اہلکار گرفتار
01 اپریل ، 2023
کراچی کے علاقے گلستان جوہر میں مفتی عبدالقیوم کے قتل میں ملوث پولیس اہلکار کو گرفتار کر لیا گیا۔
پولیس کے مطابق مفتی عبدالقیوم کے قتل کی سپاری پولیس کے انٹیلی جنس افسر محمد عتیق نے دی۔ ملزم پولیس افسر عتیق کی تصویر اور شناختی دستاویزات جیو نیوز نے حاصل کر لی ہیں۔
حکام کا بتانا ہے کہ ملزم عتیق قتل کی واردات براہ راست سی سی ٹی وی کیمرے پر دیکھتا رہا، مفتی عبدالقیوم کو قتل بھی ملزم عتیق کے گھر کے سامنے ہی کیا گیا اور قتل کی واردات سے قبل پولیس اہلکار عتیق ملزمان سے رابطے میں تھا۔
پولیس حکام کے مطابق ملزم عتیق کا ٹرانسفر حال ہی میں وفاقی تحقیقاتی ادارے میں کیا گیا تھا، ملزم عتیق کئی حساس اور اہم مقامات پر ڈیوٹیاں بھی دیتا رہا۔
پولیس حکام کا کہنا ہے کہ ملزم عتیق نے کرائے کے قاتلوں کو 2 مزید افراد کے قتل کی سپاری دی تھی۔
یاد رہے کہ مفتی عبداالقیوم کو 21 مارچ کو گلستان جوہر میں فائرنگ کر کے قتل کیا گیا تھا۔
پولیس حکام کے مطابق ملزم اور مفتی عبدالقیوم کے درمیان زمین کا تنازع تھا۔
