چاہتا ہوں ون ڈے میں چوتھے نمبر پر کھیلوں، پانچویں پوزیشن سے خوش نہیں: محمد رضوان

پاکستان کرکٹ ٹیم کے وکٹ کیپر بیٹر محمد رضوان کا کہنا ہے کہ ہر میچ ہمارے لیے نیا اور اہم ہوتا ہے، پچھلے میچ کو بھول کر نئے میچ کیلئے میدان میں اترتے ہیں۔

کراچی میں پریس کانفرنس کرتے ہوئے محمد رضوان نے کہا کہ ہمارا فوکس اس سیریز کو جیتنے پر ہے، کراچی کی وکٹ پنڈی سے مختلف ہے؟ ہماری کوشش یہ ہوگی کہ ہم کنڈیشنز کو دیکھ کر پرفارم کریں، کس وکٹ پر کتنا اسکور ہوتا ہے یہ پچ اور کنڈیشنز پر منحصر ہے، ہماری جیت ہار میں جتنا کردار ہمارا ہے اتنا آپ کا بھی ہوگا۔

شائقین کرکٹ نے اہلیہ مزنا کو حارث رؤف کیلئے خوش قسمت قرار دے دیا

نیوزی لینڈ کے خلاف دوسرے ون ڈے میں حارث نے پنڈی کی ڈیڈ پچ پر شاندار بولنگ کا مظاہر ہ کیا اور 10 اوورز میں 78 رنز دے کر 4 وکٹیں حاصل کیں۔

ان کا کہنا تھا کہ بابر اعظم کو افتخار کی جگہ لے جائیں تو آپ کو بابر نہیں ملے گا، اگر امام الحق کی جگہ افتخار کو کھلائیں تو افتخار کا کھیل نہیں ہوگا، ہر کسی کی اپنی پوزیشن ہوتی ہے، میں چاہتا ہوں ون ڈے میں چوتھے نمبر پر کھیلوں، پانچویں پوزیشن سے خوش نہیں، ضروری نہیں کہ جو میں چاہوں وہی مجھے ملے، میری خواہش علیحدہ، کپتان اور کوچ کو کیا درکار ہے وہ علیحدہ بات ہے، کپتان اور کوچ کو جو بہتر لگے گا وہ میں کروں گا۔

محمد رضوان نے کہا کہ میرے ذہن میں ذاتی سنگ میل کبھی اہمیت نہیں رکھتے، ٹیم میں آپ 11 فخر زمان نہیں رکھ سکتے، اللہ نے ہر انسان کی علیحدہ خوبی بنائی ہے، میں الگ، فخر الگ، بابر الگ ہیں، ہماری 20 کروڑ کی آبادی میں شاید 10 کروڑ  تو کمینٹیٹر ہی ہوں گے، آخری ٹی ٹوئنٹی میں ہم اپنے طے ہدف تک آگئے تھے اس لیے عماد نے سنگل لیا، اگر ہم آخری ٹی ٹوئنٹی جیت جاتے تو آج ایسے سوال نہیں ہوتے۔

وکٹ کیپر بیٹر کا کہنا تھا کہ میں آخر میں رن نہ کرسکا یہ میری غلطی ہے، مجھے ماضی میں ون ڈے میں اوپننگ کا بھی کہا گیا تھا، میں ہر نمبر پر کھیلنے کیلئے تیار ہوں۔ پاکستان میں آٹھویں نمبر  پر بھی کھیلا ہوں، جو منیجمنٹ کو صحیح لگے اور کہا جائےگا میں کروں گا، کسی سے شکوہ نہیں کرتا، میں ہر نمبر پر کھیلنے کیلئے تیار ہوتا ہوں۔

خیال رہے کہ پاکستان اور نیوزی لینڈ کے درمیان پانچ ون ڈے میچز کی سیریز میں پاکستان کو 0-2 کی برتری حاصل ہے۔ تیسرا ون ڈے بدھ 3 مئی کو کراچی میں کھیلا جائے گا۔