امن و امان برقرار رکھنے کیلئے پنجاب، کے پی اور اسلام آباد میں فوج طلب

وفاقی کابینہ نے امن و امان برقرار رکھنے کیلئے فوج  کو تعینات کرنے کی منظوری دے دی۔

ذرائع کا کہنا ہے کہ وفاقی کابینہ نے پنجاب، کے پی اور اسلام آباد میں فوج تعینات کرنےکی منظوری دی ہے۔

پی ٹی آئی کی قیادت لاہور میں کور کمانڈر ہاؤس پر حملے میں ملوث نکلی، آڈیوز لیک ہوگئیں

پی ٹی آئی کے رہنما ہونے والے نقصان پر خوشی منارہے ہیں، سینیٹر اعجاز چوہدری اور ان کے بیٹے علی چوہدری سمیت کئی مقامی رہنماؤں کی آڈیوز لیک ہوگئیں

ذرائع کے مطابق فیصل آباد میں رینجرز کی تعیناتی کی منظوری بھی دے دی گئی ہے، فیصل آبادمیں اہم شخصیات کے گھروں  پر رینجرز تعیناتی کی منظوری دی گئی ہے۔

وزارت داخلہ کی سفارش پر آئین کے آرٹیکل 245 کے تحت فوج کی تعیناتی کی منظوری دی گئی ہے۔

وزیر اعظم شہباز شریف کی زیر صدارت ہونے والے وفاقی کابینہ کے اجلاس میں ملک کی مجموعی سیاسی ، معاشی اور سکیورٹی صورتحال پر غور کیا گیا۔

دوسری جانب سندھ میں دفعہ 144 نافذ کردی گئی ہے۔

پشاور: پولیس اور پی ٹی آئی کارکنان میں جھڑپیں، 4 افراد جاں بحق

ترجمان لیڈی ریڈنگ اسپتال کے مطابق اسپتال میں اب تک 27 زخمی اور 4 لاشوں کو لایا گیا ہے، زخمی اور جاں بحق افراد کو گولیاں لگی ہیں

خیال رہے کہ گزشتہ روز چیئرمین تحریک انصاف عمران خان کی گرفتاری کے بعد ملک بھر میں مشتعل کارکنوں نے توڑ پھوڑ اور جلاؤ گھیراؤ شروع کردیا تھا۔

گزشتہ روز مشتعل مظاہرین نے کور کمانڈر لاہور کے گھر پر حملہ کیا تھا۔

آج پشاور میں پولیس اور پاکستان تحریک انصاف (پی ٹی آئی) کے مشتعل کارکنان کے درمیان جھڑپوں میں 4 افراد جاں بحق ہوگئے۔

پشاور کی شیرشاہ روڈ پر پولیس اور پی ٹی آئی کارکنان کے درمیان جھڑپیں جاری ہیں، رپورٹ کے مطابق پی ٹی آئی کے بعض کارکنان مسلح بھی ہیں جو فائرنگ بھی کر رہے ہیں جب کہ پولیس کی جانب سے بھی فائرنگ کی جارہی ہے۔