26 مئی ، 2023
لندن کے بون ہیمس نیلام گھر کی جانب سے اسلامی اور بھارتی فنون کی نیلامی کے دوران ’شیر میسور‘ ٹیپو سلطان کی تلوار کی نیلام کی گئی۔
مغل تلوار سازی اور جرمن بلیڈ ڈیزائن کے تحت بنائی ہوئی ٹیپو سلطان کی تاریخی تلوار ایک کروڑ چالیس لاکھ پاؤنڈ میں نیلام کی گئی۔
بون ہیمس میں اسلامی اور بھارتی فنون کے شعبے کے سربراہ اولیور وائٹ کا کہنا تھا کہ یہ شاندار تلوار ٹیپو سلطان سے منسوب تمام ہتھیاروں میں سب سے اہم تصور کی جاتی ہے کیونکہ اس تلوار سے ان کی ذاتی وابستگی بہت زیادہ تھی۔
انہوں نے کہا کہ یہ تلوار آج بھی بلکل ویسی ہی حالت میں ہے جیسی یہ بنائی گئی تھی، اسے بنانے کیلئے کاریگروں کی کمال مہارت اور کاریگری اسے باقی تلواروں سے منفرد بناتی ہے۔
اولیور وائٹ کا کہنا تھا کہ تلوار کے دستے پر انتہائی نفاست سے سنہرے حروف میں دعائیں تحریر ہیں جبکہ اس پر ’حاکم کی تلوار‘ کے حروف بھی لکھے ہوئے ہیں۔
بون ہیمس میں اسلامی اور بھارتی فنون کے شعبے کے سربراہ کا کہنا تھاکہ یہ تلوار بے نظیر تاریخ اور بے مثال کاریگری کا ایک شاہکار نمونہ ہے۔