09 جون ، 2023 
کراچی اور اسلام آباد میں شہدائے اے ایس ایف کی سالانہ تقاریب کا انعقاد
09 جون ، 2023
شہدائے اے ایس ایف ہیڈکوارٹرز سمیت فورس کے تمام یونٹس میں انتہائی عقیدت و احترام کے ساتھ منایا گیا۔
ترجمان اے ایس ایف کے مطابق اس دن کی اہمیت کو اجاگر کرنے کے لیے ملک بھر کے تمام ائیرپورٹس پر منعقد کی جانے والی پروقار تقاریب میں چیف سکیورٹی آفیسرز اور آفیسرز کمانڈنگز نے اس دن کی مناسبت سے ڈائریکٹر جنرل کا خصوصی پیغام پڑھ کر سنایا۔
اس ضمن میں مرکزی تقریب اسلام آباد ائیرپورٹ کے اسد شاہنواز شہید اے ایس ایف کیمپ میں منعقد ہوئی۔
ڈائریکٹر جنرل اے ایس ایف میجر جنرل عدنان آصف ہلال امتیاز ملٹری نے یادگار شہدا پر پھول چڑھائے اور شہدا کے درجات کی بلندی کے لیے دعا کی۔
تقریب میں ڈی جی اے ایس ایف نے شہدا کی لازوال قربانیوں کو خراجِ تحسین پیش کرتے ہوئے کہا کہ 8 جون شہدائے اے ایس ایف کی تاریخ کا وہ روشن باب ہے جب اے ایس ایف کے شہدا اور غازیوں نے وطن عزیز کے ائیرپورٹس کی حفاظت کے لیے اپنی جانوں کا نذرانہ پیش کیا۔
انہوں نے کہا کہ ہم نے وطن کے دفاع کی خاطر ماضی میں بھی قربانیاں دی ہیں اور آئندہ بھی مادروطن کی خاطر کسی بھی قسم کی قربانی سے دریغ نہیں کیا جائیگا، اے ایس ایف کے افسران اور جوان ائیرپورٹس کی حفاظت کیلئے اپنی بہترین پیشہ ورانہ مہارت اور جذبہ ایمانی سے دشمن کی ہر تخریبی کوشش کو ناکام بنانے کے لیے ہمہ وقت تیار ہیں۔
