ورلڈکپ 2023کیلئےکوالیفائی نہ کرنے پر ویسٹ انڈین کرکٹرز اپنے بورڈ پر برس پڑے

 اسکاٹ لینڈ سے شکست کے  بعد ورلڈکپ 2023 کیلئے کوالیفائی نہ کرنے پر  ویسٹ انڈین کرکٹرز نے  اپنے ہی کرکٹ بورڈ کو سخت تنقید کا نشانہ بنایا ہے۔

 ورلڈکپ کوالیفائر سپر سکس میں اسکاٹ لینڈسے  7 وکٹوں سے شکست  کے بعد ویسٹ انڈیز ورلڈکپ کیلئے کوالیفائی کرنے میں ناکام ہوگئی ہے جس پر  2016 میں ویسٹ انڈیز کو ٹی ٹوئنٹی ورلڈکپ جتوانے والے آل راؤنڈر کارلوس بریتھ ویٹ اپنے ہی کرکٹ بورڈ پر برس پڑے  اور  برہمی کا اظہار کرتے ہوئے کہا کہ یہ وہ کم ترین جگہ ہے جہاں آپ جا سکتے ہیں۔

اسکاٹ لینڈ سے شکست، ویسٹ انڈیز پہلی بار ورلڈکپ کیلئے کوالیفائی نہ کرسکا

ویسٹ انڈیز ٹیم 2 مرتبہ عالمی چیمپئن رہ چکی ہے

کارلوس بریتھ ویٹ نے کہا کہ یہ چیز عرصہ دراز سے ہماری طرف بڑھ رہی تھی، گزشتہ برس ٹی ٹوئنٹی فارمیٹ کا سپر  12 مرحلہ مس کیا، انہوں نے کہا کہ وائٹ بال کرکٹ میں گزشتہ برسوں سے مشکلات رہی ہیں، ویسٹ انڈیز کرکٹ کو بے شمار مسائل کا سامنا ہے، ٹیلنٹ کی شناخت نہ کر پانا مسائل میں سے ایک ہے۔

 یہ ڈرامائی انداز سے اپنے ایک مقام سے گرنا ہے : این بشپ 

 دوسری جانب  سابق ویسٹ انڈیز ٹیسٹ فاسٹ بولر  این بشپ کا کہنا تھا کہ  یہ ڈرامائی انداز سے اپنے ایک مقام سے گرنا ہے،  ویسٹ انڈیز ٹیم ون ڈے اور ٹی ٹوئنٹی ورلڈکپ دو دو بار جیت چکی ہے

انہوں نے کہا کہ ویسٹ انڈیز کی ٹیم بلند عزائم کے ساتھ کوالیفائنگ راؤنڈ کھیلنے کے لیے آئی لیکن گروپ کے مرحلے میں کارکردگی انتہائی مایوس کن رہی، کپتان تبدیل کرو، کوچ تبدیل کرو ، جو چاہے تبدیلی لاؤ لیکن نتائج توقعات کے برعکس ہیں۔

ورلڈ کپ 2023 ویسٹ انڈیز کے بغیر ہونے والا پہلا ورلڈکپ

ورلڈ کپ کوالیفائر سپر سکس میں اسکاٹ لینڈ سے  شکست کے ساتھ ہی دو مرتبہ کا عالمی چیمپئن ویسٹ انڈیز پہلی بار ورلڈکپ کیلئے کوالیفائی نہ کرسکا۔ یہ ورلڈکپ کوالیفائرز میں ویسٹ انڈیز کی مسلسل تیسری شکست تھی جس کے بعد وہ پہلی مرتبہ ورلڈ کپ کیلئے کوالیفائی کرنے میں ناکام ہوگئی۔

بھارت میں ہونے والا کرکٹ ورلڈ کپ 2023 ویسٹ انڈیز کے بغیر ہونے والا پہلا ورلڈکپ ہوگا۔