12 ستمبر ، 2023 
سپریم کورٹ کا لاہورہائیکورٹ کو چینی کی قیمتوں کےکیس کا فیصلہ 30 روز میں کرنےکا حکم
12 ستمبر ، 2023
سپریم کورٹ نے وفاقی حکومت کی جانب سے چینی کی قیمت مقرر کیے جانے سے متعلق کیس میں لاہور ہائی کورٹ کو کیس کا 30 روز میں فیصلہ کرنےکی ہدایت کردی ہے۔
سپریم کورٹ میں چینی کی قیمتیں مقرر کیے جانے سے متعلق کیس کی سماعت جسٹس اعجاز الاحسن کی سربراہی میں تین رکنی بینچ نےکی۔
دوران سماعت شوگر ملز کے وکیل نے عدالت کو بتایا کہ ہائی کورٹ میں کیس 20 ستمبر کو مقرر ہے۔
ایڈیشنل اٹارنی جنرل عامر رحمان نےکہا کہ سپریم کورٹ نے چینی کی قیمتوں کے تعین پر حکم امتناع دیا تھا، ہائی کورٹ میں انٹراکورٹ اپیل پر فیصلہ ہےکہ چینی کی قیمتوں کا تعین وفاق کا اختیار ہے،لاہور ہائی کورٹ کے فیصلےکو کسی نے چیلنج نہیں کیا۔
جسٹس اعجازالاحسن نےکہا کہ ہائی کورٹ میں ابھی معاملہ زیر التوا ہے تو اس پر فیصلہ کیسے کر دیں؟ پہلے لاہور ہائی کورٹ کو اس معاملے پر فیصلہ کرنے دیں۔
ایڈیشنل اٹارنی جنرل نے کہا کہ چینی کی قیمت 98 روپے مقرر ہے اور شوگر ملز مالکان 200 روپے میں فروخت کر رہے ہیں۔
جسٹس اعجاز الاحسن نے کہا کہ اگر قیمتوں کے تقرر کا قانون کالعدم ہو جاتا ہے تو معاملہ ہی ختم ہو جائےگا۔
ایڈیشنل اٹارنی جنرل نےکہا کہ شوگر ملز والے نہ پنجاب حکومت کی مقررہ قیمتوں کو تسلیم کرتے ہیں نا وفاق کی۔
جسٹس اعجاز الاحسن نے کہا کہ لاہور ہائی کورٹ کو حکم دے رہے ہیں کہ 20 ستمبر سے روزانہ کی بنیاد پر سماعت کر کے فیصلہ کرے، کیس کی سماعت غیر معینہ مدت کے لیے ملتوی کردی گئی۔
