01 اکتوبر ، 2023 
میانوالی میں ہلاک دہشتگردوں کی شناخت ہو گئی، امیر ٹی ٹی پی لکی مروت کا بھائی بھی شامل
01 اکتوبر ، 2023
میانوالی میں پولیس مقابلے میں ہلاک دونوں دہشتگردوں کی شناخت ہو گئی۔
سی ٹی ڈی حکام کے مطابق ہلاک دہشتگردوں کی شناخت زبیر نواز اور محمد خان کے ناموں سے ہوئی ہے جن کا تعلق کالعدم ٹی ٹی پی سے تھا۔
سی ٹی ٹی حکام کا بتانا ہے کہ زبیر نواز کا تعلق کالعدم ٹی ٹی پی کے ٹیپو گروپ سے تھا جو لکی مروت کے ٹی ٹی پی امیر ارشد نواز کا بھائی تھا، زبیر نواز پنجاب میں فرقہ وارانہ قتل، بھتہ خوری اور سنگین جرائم میں مطلوب تھا۔
حکام کے مطابق دوسرے ہلاک دہشتگرد کی شناخت محمد خان کے نام سے ہوئی ہے، محمد خان کا تعلق بھی کالعدم ٹی ٹی پی کے ٹیپو گروپ سے تھا۔
سی ٹی ٹی حکام کا کہنا ہے کہ دونوں دہشتگردوں کی شناخت انٹیلی جنس ایجنسیوں اور جدید سافٹ وئیرز کی مدد سے ہوئی۔
یاد رہے کہ رات گئے 10 سے 12 دہشتگردوں نے میانوالی میں کنڈل کے مقام پر پیٹرولنگ چیک پوسٹ پر دو اطراف سے حملہ کیا تھا جسے پولیس کے بہادر جوانوں نے ناکام بنا دیا تھا۔
آئی جی پنجاب پولیس ڈاکٹر عثمان انور کے مطابق پولیس اہلکاروں نے بھرپور جوابی کارروائی میں دو دہشتگردوں کو فائرنگ کر کے ہلاک کیا جبکہ ایک جوان نے بہادری سے لڑتے ہوئے جام شہادت نوش کیا۔
نگران وزیر اعلیٰ پنجاب محسن نقوی نے بھی میانوالی میں پولیس چیک پوسٹ پر حملہ ناکام بنانے والے پولیس اہلکاروں کو شاباش دیتے ہوئے جام شہادت نوش کرنے والے اہلکار کو خراج عقیدت پیش کیا۔
