صحت و سائنس

اکثر آدھی رات کو اچانک نیند سے بیدار ہو جاتے ہیں؟ تو اس کی وجوہات جانیں

02 جنوری ، 2024

اس کی متعدد وجوہات ہو سکتی ہیں / فائل فوٹو

کیا روزانہ سونے کے بعد آدھی رات کو اچانک آنکھ کھل جاتی ہے؟

اگر ہاں تو ایسا دنیا بھر میں متعدد افراد کے ساتھ ہوتا ہے۔

ایک تحقیق میں بتایا گیا تھا کہ صرف امریکا میں ایک تہائی افراد ہر ہفتے کم از کم 3 بار آدھی رات کو جاگتے ہیں اور ان میں سے 40 فیصد کو دوبارہ سونے میں مشکلات کا سامنا ہوتا ہے۔

مگر ایسا ہوتا کیوں ہے اور کیا اس سے بچنا ممکن ہے؟

تو وہ وجوہات جانیں جو آپ کو روزانہ یا اکثر آدھی رات کو جاگنے پر مجبور کر دیتی ہیں۔

کمرہ بہت زیادہ گرم یا ٹھنڈا ہوتا ہے یا وہاں روشنی اور شور ہوتا ہے

ہر فرد کی نیند کی عادات مختلف ہوتی ہیں اور اس کا انحصار اس بات پر ہوتا ہے کہ نیند کتنی گہری ہے۔

ہماری نیند 4 مختلف مراحل سے گزرتی ہے اور پہلے مرحلے میں نیند سب سے زیادہ ہلکی ہوتی ہے۔

تو اس مرحلے میں کمرے میں شور ہونے یا روشنی ہونے سے آنکھ فوراً کھل جاتی ہے۔

اسی طرح کمرہ بہت گرم یا ٹھنڈا ہو جائے تو بھی نیند اڑ جاتی ہے۔

اگر کمرے میں اکثر شور یا روشنی ہوتی ہے تو اس کا حل یہ ہے کہ ائیر پلگ اور آئی ماسک کا استعمال کریں۔

انزائٹی

انزائٹی ایسا ذہنی عارضہ ہے جو آدھی رات کو نیند سے جگا دیتا ہے۔

درحقیقت انزائٹی کی ایک عام علامت بے خوابی ہے۔

انزائٹی کے شکار افراد گھبراہٹ یا پریشانی کو بہت زیادہ محسوس کرتے ہیں جس کے باعث ان کے لیے سونا مشکل ہوتا ہے یا نیند کے دوران اچانک آنکھ کھل جاتی ہے جس کے بعد دوبارہ سونا مشکل ہوتا ہے۔

اس سے بچنے کا طریقہ یہی ہے کہ ڈاکٹر سے رجوع کیا جائے جو مرض کی تشخٰص کرکے علاج تجویز کرے گا۔

خراٹے یا سلیپ اپنیا

اگر اکثر ایک جھٹکے سے نیند سے بیدار ہوتے ہیں اور سانس لینا مشکل محسوس ہوتا ہے تو سلیپ اپنیا نامی عارضہ اس کے پیچھے ہو سکتا ہے۔

سلیپ اپنیا کے شکار افراد کی سانس نیند کے دوران بار بار رکتی ہے جس سے خراٹوں کے ساتھ ساتھ متعدد طبی پیچیدگیوں کا خطرہ بھی بڑھتا ہے۔

اس سے بچنے کے لیے ڈاکٹر ہی آپ کی مدد کر سکتا ہے۔

سونے سے کچھ دیر قبل کھانا یا کئی گھنٹوں قبل کھانا

سونے کے وقت کے قریب پیٹ بھر کر کھانے سے سونا مشکل ہوتا ہے یا نیند کے دوران بار بار آنکھ کھلتی ہے۔

اس کی وجہ یہ ہے کہ کھانے سے معدے میں موجود تیزابی سیال حلق کی جانب آتا ہے جس سے سینے میں جلن ہوتی ہے اور نیند اچاٹ ہو جاتی ہے۔

دوسری جانب نیند کے وقت سے کئی گھنٹوں قبل کھانے سے بھی آدھی رات کو آنکھ کھل سکتی ہے۔

اس کی وجہ بھوک ہوتی ہے جو اچھی نیند کا حصول مشکل بناتی ہے۔

ان دونوں سے بچنے کا طریقہ بھی بہت آسان ہے اور یہ ہے کہ سونے سے 2 سے 3 گھنٹے قبل کھانے کو عادت بنائیں۔

مثانے کا زیادہ متحرک ہونا

مثانہ زیادہ متحرک ہوتا ہے تو آپ کو رات میں کئی بار پیشاب کرنے کے لیے اٹھنا پڑتا ہے۔

مثانے کے زیادہ متحرک ہونے یا پیشاب کی نالی کی سوزش کے شکار افراد اکثر آدھی رات کو جاگ کر ٹوائلٹ کا رخ کرتے ہیں۔

اسی طرح کئی بار رات کو سونے سے قبل زیادہ مقدار میں پانی پینے سے بھی اس مسئلے کا سامنا ہوتا ہے۔

ذیابیطس کے مریضوں میں بھی یہ مسئلہ کافی عام ہوتا ہے، خاص طور پر اس وقت اگر بلڈ شوگر لیول کو کنٹرول میں نہ رکھا جائے۔

اس مسئلے سے بچنے کے لیے رات کو سونے سے قبل بہت زیادہ پانی پینے سے گریز کریں، اگر پھر بھی نیند اچاٹ ہو جاتی ہے تو ڈاکٹر سے رجوع کریں تاکہ مرض کی درست تشخیص ہوسکے۔